८ बैशाख २०७९, बिहीबार

काठमाडौं । बैशाख ३० गते हुने स्थानीय तहको निर्वाचनका लागि हालसम्म एक करोड १९ लाख मतपत्र छापिएको छ । विहीबार काठमाडौंमा आयोजित नियमित पत्रकार सम्मेलनमा निर्वाचन आयोगले हालसम्म ५३ जिल्लाका लागि १ करोड १९ लाख मतपत्र छापिसकिएको जानकारी दिएको हो ।

आयोगका प्रवक्ता शालिग्राम शर्मा पौडेलले निर्वाचनका लागि द्रूत रुपमा मतपत्र छापिने क्रम जारी रहेको जानकारी दिए । त्यस्तै बाजुरा, अछाम, सोलुखुम्बु, मुगुसहितका जिल्लाहरुमा निर्वाचन सामग्री पठाउने क्रम सुरु भइसकेको उनले बताए । सडक सञ्जाल जोडिएका स्थानमा सडक मार्गबाट र डोल्पा र मुगुमा भने द्रूत मार्ग वा हवाई मार्गबाट मतपत्र ढुवानी बैंशाख १४ बाट सुरु हुने पौडेलले बताए ।

प्रवक्ता पौडेलले स्थानीय तहको निर्वाचन पर्यवेक्षण गर्नको लागि ४४ वटा राष्ट्रिय संस्थालाई प्रवेक्षण अनुमति दिइएको उल्लेख गरे । त्यस्तै उनले ७७ जिल्लामा मुख्य निर्वाचन अधिकृतको कार्यालय र सवै स्थानीय तहमा निर्वाचन अधिकृतको कार्यालय स्थापना भएको बताए ।

पर्यवेक्षकले पर्यवेक्षण गरेको प्रतिवेदन ३० दिनभित्र आयोगमा पेश गर्नुपर्ने पौडेलले बताए ।

 

प्रतिक्रिया दिनुहोस्
LIVE TV