२९ चैत्र २०७८, मंगलवार

काठमाडौं । नेपाली कांग्रेसका प्रवक्ता डा. प्रकाशशरण महतले एमसीसी सम्झौताको सम्बन्धमा जनतामा रहेको भ्रमलाई चिरेको बताएका छन् । मंगलबार फागुन २९ गतेदेखि चैत्र २९ गतेसम्म चलेको पार्टीको ‘घर–घर जाऔँ, कांग्रेस जिताऔँ’ अभियानको सम्बन्धमा जानकारी दिन आयोजना गरिएको पत्रकार सम्मेलनमा बोल्दै प्रवक्ता महतले अभियानका क्रममा एमसीसीको सम्बन्धमा जनतामा रहेको भ्रमलाई चिर्न सफल भएको बताएका हुन् ।

त्यसैगरी अभियानमा नेपाली कांग्रेसले गरेका विकास निर्माणको कामको सम्बन्धमा पनि जनतालाई बुझाएको उनले बताए । विगतमा कोभिड–१९ को बेलामा तत्कालीन केपी शर्मा ओली नेतृत्वको सरकारले भ्रष्ट्राचारका कारण कोभिडको व्यवस्थापन गर्न नसकेको भन्दै प्रवक्ता महतले कांग्रेस नेतृत्वको सरकार आएपछि खोपलाई व्यापकता दिन सकेको र कोभिड व्यवस्थापन गर्न सकेको कुरा जनतालाई स्पष्ट पारको पनि उल्लेख गरे ।

ओली नेतृत्वको सरकारले गरेका गलत काम बारेपनि जनतालाई जानकारी गराउँदै कांग्रेस नेतृत्वको सरकारले गरेका राम्रा कामहरुको प्रचार गरिएको उनले बताए ।

उनले भने, ‘यस बीचमा नेपाली कांग्रेसले विगतमा गरेका कामहरु जुन ओझेलमा परेका थिए । हामीले प्रचार गरेनौँ । काम गरिहालेका छौँ । जनताले आफैँ बुझिहाल्छ भन्ने मानसिकतामा हामीले काम ग¥यौँ । जसले गर्दा हाम्रा कामहरु त्यति हाइलाइट हुन सकेका थिएनन् । त्यसलाई पनि यो अभियानको दौरानमा हामीले जनताको बिचमा सुस्पष्ट ढंगले राख्न सक्यौँ । त्यसले कतिपय भ्रमहरु हामीले चिर्न सफल भयौँ ।’

उनले थपेका छन्, ‘केपी शर्मा ओलीको नेतृत्वमा बनेको सरकारले कोभिडको दौरानमा पनि ठूलो घोटाला, भ्रष्ट्राचार । जनता घरबाट निस्किन सक्ने अवस्थामा थिएनन् । रोजगारी गुमेको थियो । धेरै ठूलो संख्यामा नागरिकहरु कोभिडबाट प्रभावित भएका थिए । त्यस्तो अवस्थामा पनि फाइदा उठाउने अवसरको रुपमा जसरी ओली सरकाले लियो । त्यसबाट कोभिड व्यवस्थापन सुस्त भयो । र त्यसलाई कसरी नेपाली कांग्रेस पार्टी आएपछि खोपलाई व्यापक बनाएर हामीले ७५.७ प्रतिशतलाई पूर्ण खोप दिलाउन सरकार सफल भयो । जसमा ६६.१ प्रतिशतले दोस्रो चरणको खोप पनि प्राप्त गर्न सफल भए ।’

उनले फेरि भने, ‘संविधानलाई डिरेल गरेर ओलीजीले जुन बाटोमा देशलाई अग्रसर गराउनु भएको थियो । त्यसलाई हामी ट्रयाकमा ल्यायौँ । र संवैधानिक अधिकारको विभाजन, शक्तिको पृथकीकरण सिद्धान्तको आधारमा जुन चलेको छ । त्यसलाई फेरी आ–आफ्नो ठाउँमा स्थापित गर्न हाम्रो पार्टीको नेतृत्वमा सफल भएका कुरापनि हामीले त्यहाँ राख्यौँ । ओलीको पालमा वैदेशिक ऋण बढ्दै थियो । भ्रष्ट्राचार व्यापक थियो । ती कुरा हामीले रोक्न सफल भयौँ । एमसीसीको सहयोग अर्निणित भएको थियो । अन्यौल सिर्जना भएको थियो । अन्तर्राष्ट्रिय जगतमा हाम्रो शाख गिरेको थियो । त्यसलाई पुर्नस्थापित गर्न कसरी हामी सफल भयौँ यी सम्पूर्ण कुराहरु हामीले राख्न सफल भयौँ ।’

यसका साथै प्रवक्ता महतले स्थानीय तह निर्वाचन नजिकिए पनि टिकटको तय गर्न प्राविधिक कठिनाइ भएको बताए । गठबन्धन र तालमेलका कारण टिकटको टुंगो लगाउन ढिलाइ भएको उनले बताए । स्थानीय परिस्थिति र आवश्यकता अनुसार गठबन्धनमा रहेका दलहरुसँग तालमेल गर्ने उनले स्पष्ट पारे ।

उनले भने, ‘टिकटको तय गर्न केही समय लागेको छ । प्राविधिक कठिनाइहरु छन् । र गठबन्धन, तालमेलका पनि कुराहरु छन् । ति टुंगो लगाउने कुराहरु जटिल नै छन् । केही समय लागेको छ । त्यसमा पनि चाडै नै हामीले कहाँ कहाँ कसरी तालमेल गरेउ भन्ने कुरा थाहा पाउनुहुनेछ । स्थानीय परिस्थिति र आवश्यकता अनुसार गठबन्धनमा रहेका दलहरुसँग तालमेल गर्ने कुरा नै हो । निर्णय गर्न विभिन्न तहको संरचनालाई विधानले अधिकार दिएको छ त्यही अनुसार हुन्छ ।’

प्रतिक्रिया दिनुहोस्
LIVE TV