२ मंसिर २०७८, बिहीबार

काठमाडौं । सञ्चारकर्मीहरुलाई सम्मान र प्रोत्साहन गर्ने हेतुले नेपालमा पहिलो पटक ‘नेपाल मिडिया अवार्ड’ हुने भएको छ । ड्रिम हाइ नेपाल प्रा.लि.को आयोजना र नेपाल पत्रकार महासंघको सहकार्यमा हुने अवार्डको बुधबार राजधानीको होटल सोल्टीमा आयोजित एक कार्यक्रम मार्फत औपचारिक घोषणा गरिएको हो ।

‘नेपाल मिडिया अवार्ड २०७८’ नाम दिइएको उक्त अवार्ड कुल २५ विधामा वितरण हुने आयोजकले जनाएको छ । ‘टेलिभिजन, छापा मिडिया, एफएम रेडियो र अनलाइन पत्रकारिता अन्तर्गत सञ्चार माध्यम र सञ्चारकर्मीहरुको पछिल्लो एक वर्षयताको उपस्थिति र प्रस्तुतिलाई आधार बनाएर सम्मान प्रदान गरिनेछ’, आयोजक संस्थाका प्रबन्ध निर्देशक कमल जिसीले भने ।

उनले थप भने, ‘उल्लेखित विधा बाहेक भुगोलतर्फको सात प्रदेशबाट २,२ जनालाई सम्मान गरिनेछ भने नेपाली मिडियाको विकासक्रममा उल्लेख्य योगदान पुर्याउनु हुने दुई विशिष्ठ सञ्चारकर्मीलाई ‘लाइफटाइम एचिभमेन्ट’ सम्मान प्रदान गरिनेछ ।’

नेपाल पत्रकार महासंघसँगको समन्वयमा महासंघका पूर्व अध्यक्षसहित सञ्चार विज्ञसहितको ५ सदस्यीय निर्णायक टिमले सम्मानित सञ्चारकर्मीहरुको छनोट गर्ने आयोजकले बताएको छ । कार्यक्रममा पत्रकार महासंघ सचिव पवन आचार्यले सञ्चारकर्मीहरुको कामलाई सम्मान गर्ने र हौसला दिने यो प्रकारको काममा महासंघ सहकार्य गर्न पाएको भन्दै खुशी व्यक्त गरे ।

आगामी पुष २३ मा आयोजना हुने उक्त अवार्ड समारोहको घोषणा कार्यक्रममा वरिष्ठ सञ्चारकर्मी तथा फिल्म निर्देशक दिनेश डिसी, नेपाली फिल्म अभिनेता रमेश उप्रेतीलगायत पत्रकारितासँग प्रतिनिधित्व गर्ने दर्जन बढी संस्थाका अध्यक्ष तथा प्रतिनिधिहरु उपस्थित थिए ।

कार्यक्रममा प्रायोजक कम्पनी ‘ब्ल्याकहर्स सूज इन्डष्ट्रिज प्रा.लि. र जोय पपैया नेपालसँग आयोजकले प्रायोजन सम्झौता समेत गरेको छ । आयोजकको तर्फबाट ड्रिम हाइ नेपालका प्रवन्ध निर्देशक जिसीले ब्ल्याक हर्स सूजका चीनबहादुर श्रेष्ठ र जोय पपैया नेपालका कन्ट्री म्यानेजर मदन रौनियारसँग सम्झौता आदान प्रदान गरेका थिए ।

प्रतिक्रिया दिनुहोस्

LIVE TV