१६ कार्तिक २०७८, मंगलवार
  • महेश पाण्डे,

चितवन । नेपाली कांग्रेसका वरिष्ठ नेता रामचन्द्र पौडेलले कम्युनिष्ट पार्टी एउटा भ्रम, नारा र अन्धकार मात्रै रहेको बताउदै उनीहरुको पर्दाफास भएको बताएका छन् । नेपाली कांग्रेस रत्ननगर–१३ कार्यसमितिले आज (मंगलबार) चितवनमा आयोजना गरेको कार्यक्रममा बोल्दै वरिष्ठ नेता पौडेलले यस्तो बताएका हुन् ।

उनले नेपाली जनताले कम्युनिष्ट पार्टीलाई दुई तिहाई भन्दा बढी मत दिएर ‘पाँच वर्ष देशमा शासन गर र देशको काँचुली फेर’ भनेर पठाएको भएपनि कम्युनिष्ट पार्टी एउटा भ्रम, नारा र अन्धकार भएका कारण अहिले पतनको श्रृङ्खला सुरु बताए ।

अहिले नेपालमा पनि कम्युनिष्टहरुको पर्दाफास हुदै गएको बताउदै पौडेलले विश्वबाटनै कम्युनिष्टहरु बिस्तारै लोप हुदै गएका कारण कम्युनिष्टका कुरा पत्याउने दिन सकिएको जिकिर गरे । पौडेलले कम्युनिष्ट भनेको मानिसको बिज्ञान, संस्कृति, प्रकृति र सिद्धान्तसँग मिल्ने कुरा नभएको र जबरजस्ती ल्याइएको बिचार भएकाले सो कुरा बैज्ञानिक खालको नभएको बताए ।

‘नेपालमा राजसंस्था थियो त्यो पनि सकियो’ भन्दै पौडेलले कम्युनिष्ट पनि बिस्तारै पतनको बटोमा लागेपछि एउटा सत्य भनेको कांग्रेस मात्रै भएको जिकिर गरे । उनले कम्युनिष्टहरु जसरी हुन्छ सत्तामा पुग्ने अनि भ्रष्टचार गर्ने तथा भ्रष्टाचार गरेको पैसाबाट सदैब सत्ता कब्जा गर्ने ध्याउन्नमा हुने बताउदै कम्युनिष्टका कुरामा कसैले बिश्वास गर्न नहुने बताए ।

पौडेलले संवैधानिक परिषदको ऐनलाई जथाभावी मोडेर केही ब्यक्तिले सेटिङ्ग गरेका कारणले नै अदालतले अहिलेको अवस्था भोग्नु परेको बताए । उनले यही अवस्था रहे देशमा संवैधानिक संकट निम्तिने धारणा ब्यक्त गरे ।

उनले १३ औं महाधिवेशनको गल्ती कांग्रेसले भोगिरहेको बताउदै अहिले १४ औं महाधिवेशन चलिरहदा ढाकछोप गर्ने बेला नभएको बताए । २००७ सालदेखि लड्दै आएको कांग्रेस गत निर्वाचनमा ३० प्रतिशतमा खुम्चन पुगेको बताउदै पौडेलले पार्टी सभापति देउवालाई संकेत गर्दै नेतृत्व सही नभएकालेनै यस्तो परिणाम आएको बताए ।

उनले सिद्धान्त, संघर्ष र नेताको ईतिहास हुदैमा सदैव जनताले पत्याउँछन्, भन्ने नहुने बताउदै पार्टीभित्र विकृति भएकै कारण गएको निवार्चनमा हार ब्यहोर्नु परेको बताए । १० वर्षसम्म पनि भातृ संगठनको निर्वाचन हुन नसकेको बताउदै पौडेलले सबै भातृ संगठन कमजोर हुनुमा त्यसको जिम्मेवारी नेतृत्वले लिनुपर्ने बताउदै सो बिषयमा आन्तरिक छलफल आवश्यक रहेको धारणा ब्यक्त गरे ।

उनले पार्टीलाई रुपान्तरण गर्दै एकता आवश्यक रहेकाले आफूले राखेका दुई–तीन वटा एजेण्डा मिले आफू मिलेर अगाडि बढ्न तयार रहेको बताए । पाटीमा न्याय, पारदर्शिता चाहिने बताउदै पौडेलले समयबद्ध भएर सबैले काम गर्न आवश्यक रहेको बताए । उनले मिले भनेर देखावटी मेलमिलापले मात्रै पार्टीमा केही हुन नसक्ने बताए ।

१४ औं महाधिवेशन परीक्षाको घडी भएको बताउदै पौडलेलले गुटबन्दी र ब्यक्ति पूजामा लाग्नु भन्दा पनि कांग्रेसलाई बलियो बनाउन सबै लाग्नुपर्ने धारणा ब्यक्त गरे ।

प्रतिक्रिया दिनुहोस्

LIVE TV