१६ कार्तिक २०७८, मंगलवार

काठमाडौँ । नेपालमा नवप्रवर्तनकारी व्यवसाय (स्टार्टअप)को प्रवर्द्धनका लागि नेपाल उद्योग परिसंघले ‘स्टार्टअप अभियान समिति’ गठन गरेको छ । समितिकाे सभापति युवा उद्यमी आयुषी केसी चयन भएकी छन् ।

समितिको कोअर्डिनेटिङ उपाध्यक्षमा परिसंघकै उपाध्यक्ष रोहित गुप्ता रहेका छन् भने  सह-सभापतिमा चाङ अग्रवाल छन् । यसैगरी सागरदेव भट्ट, अमुन थापा, रुपेशकृष्ण श्रेष्ठ, मनिष श्रेष्ठ, प्राची अग्रवाल, तेजिङ गोन्सर, डा मनिष थापा, लतिका गोल्यान, शिखर पण्डित, सुमन रायमाझी र इमरान अली समितिको सदस्य रहेका छन् ।

नेपालमा स्टार्टअपलाई अभियानका रुपमा अघि बढाउने र नवप्रवर्तनकारी व्यवसायलाई अर्थतन्त्रको महत्वपूर्ण अंगको स्थापित गर्ने उद्देश्यले समिति गठन गरिएको बताइएकाे छ । यसले नेपालमा स्टार्टअपको निरन्तर प्रवर्द्धनको काम गर्नेछ ।

कार्यक्रममा परिसंघका अध्यक्ष विष्णुकुमार अग्रवालले स्टार्टअपलाई अघि बढाउन सरकारले विभिन्न नीतिगत व्यवस्था गरेको भन्दै त्यसको कार्यान्वयनका लागि समितिले सरकारसँग सहकार्यक्रमा काम गर्न सक्ने बताए ।

उनले व्यवसायका स्वरुपहरु परिवर्तन भइरहेको भने नयाँ क्षेत्रहरुमा काम गर्ने सम्भावना रहेको उल्लेख गरे । ‘अहिले व्यवसायमा परिवर्तन भइहेका छन्, यसै समितिमार्फत मेन्टरसिपको काम गर्न सकिन्छ,’ उनले भने, ‘सरकारले ५ वटासम्म स्टार्टअपलाई १ लाख रुपैयाँका दरले प्रदान गर्न सकिने भनेको छ, त्यसमा पनि यस समितिले काम गर्न सक्छ ।’

यसैगरी परिसंघका उपाध्यक्ष रोहित गुप्ताले यस समितिमार्फत व्यवसायमा आएका नयाँ नयाँ सोचबारे सदस्यहरुलाई जानकारी गराउन सकिने बताए ।

समितिकी सभापति आयुषी केसीले कोरोना महामारीका कारण २५ प्रतिशत स्टार्टअप बन्द भएको बताउँदै यस्ता व्यवसायको सफलताको दर असाध्यै कमजोर रहेको उल्लेख गरे । उनले सन् २०२२ को मार्चभित्रमा नेपालमा स्टार्टअप सम्मेलन गर्ने सोच यस समितिको रहेको जानकारी गराए ।

प्रतिक्रिया दिनुहोस्

LIVE TV