१३ कार्तिक २०७८, शनिबार

काठमाडौं । प्रतिपक्ष दल नेकपा एमालेका अध्यक्ष केपी शर्मा ओलीले शुक्रबार माओवादी केन्द्रका अध्यक्ष पुष्पकमल दाहाल ‘प्रचण्ड’ ले गृह जिल्ला चितवनमा लगाएको गम्भीर आरोपको जवाफ दिएका छन् ।

शनिबार एमाले सिन्धुपाल्चोक–काठमाडौं सम्पर्क मञ्चको बृहत कार्यकर्ता भेलामा बोल्दै अध्यक्ष ओलीले आफूमाथि लगाइएको आरोपको जवाफ दिएका हुन् ।

अध्यक्ष प्रचण्डले ओली प्रधानमन्त्री हुँदा आजिवन बालुवाटार छोड्न नपर्ने उद्धेश्यका साथ थाइल्याण्ड र इटलीबाट महंगो सामान खरिद गरेको आरोप लगाएका थिए ।

अध्यक्ष प्रचण्डको आरोप थियो, ‘बालुवाटारमा प्रधानमन्त्री निवास दरबारजस्तो बन्दैछ, प्रधानमन्त्रीको निजी कार्यालय त्यस्तै दरबार बन्दैछ। हामीलाई त अहिले थाहा भयो केपी ओलीले त त्यो दरबार जिन्दगीभरि छोड्नु पर्दैन भनेर थाइल्याण्ड, इटलीबाट महँगो सामान ल्याएर राखेका रहेछन्।’

शुक्रबार अध्यक्ष प्रचण्डले आफूमाथि लगाएको आरोपको प्रतिरोध गर्दै शनिबार अध्यक्ष ओलीले जवाफ दिए, ‘मेरो भान्सामा त आफ्नै भाँडाकुँडा हुन्थे । के को किन्नु सरकारले । प्रधानमन्त्री निवासमा सेना बस्छ । सेनाले खाना खानुपर्‍यो होला। ग्याँस खर्च भयो होला । मेरो श्रीमतीले बनाएको यति खाना खाएर बस्ने म, अनि किन चाहियो करोडौंको भाँडाकुँडा ?’

अध्यक्ष ओलीका अनुसार सुन र आल्मुनियमको भाँडामा पकाएर खानुमा कुनै फरक छैन । विरोधहरुले आफ्नो विरोध गर्न विभिन्न किस्सा बनाए पनि आफूलाई त्यस्तो किस्सा बनाउन आवश्यक नरहेको पनि उनले बताए ।

प्रतिक्रिया दिनुहोस्

LIVE TV