१२ आश्विन २०७८, मंगलवार

काठमाडौं । प्रतिनिधिसभा अन्तर्गतको शिक्षा तथा स्वास्थ्य समितिले चिकित्सा शिक्षासँग सम्बन्धित कर्मचारीका छोराछोरी र स्थानीयबासीले पाउने आरक्षणका सम्बन्धमा स्पष्ट व्यवस्था गर्न सरकारलाई निर्देशन दिएको छ ।

सिंहदरबारमा मंगलबार बसेको समितिको बैठकले चिकित्सा शिक्षा आयोगले बनाएको ऐनका आधारमा चिकित्सा शिक्षासंग सम्बन्धित कर्मचारीका छोराछोरीको आरक्षणका सम्बन्धमा आवश्यक व्यवस्था गर्न निर्देशन दिएको हो ।

समिति सभापति जयपुरी घर्तीले ऐनमा टेकेर सम्भव भएसम्म यस क्षेत्रसँग सम्बन्धित कर्मचारीका छोराछोरीलाई आरक्षणको व्यवस्था गर्न निर्देशन दिइएको जानकारी दिइन् । आगामी दिनमा हुने परीक्षामा आवश्यक परे ऐनमा टेकेर नियमावली परिमार्जन गर्न पनि सुझाव दिइएको उनले बताइन् ।

त्यस्तै मृगौला बिरामीहरुको समस्यालाई मध्यनजर गर्दै डायलासिल वा प्रत्यारोपण कुन उपयुक्त हुन्छ भन्नेमा बिज्ञहरुसंग समितिले छलफल गर्ने सभापति घर्तीले जानकारी दिइन् । बैठकमा सांसद खगराज अधिकारीले नेपालमा एमविविएस गरेका विद्यार्थीहरुको योग्यताका बारेमा अन्य देशमा प्रश्न नउठ्ने गरि कुटनीतिक तहमा स्पष्ट कुरा राख्नुपर्ने बताए ।

उनले चिकित्सा शिक्षासंग सम्बन्धित कर्मचारीका छोराछोरी र स्थानीयबासीले आरक्षण नपाएको भन्दै यसलाई गम्भीर रुपमा छलफल गर्नुपर्ने धारणा राखे । त्यस्तै सांसद गिरिराजमणी पोखरेलले आरक्षणलाई प्रभावकारी कार्यान्वयन गर्दै यहि वर्षदेखि नै लागू गर्न सुझाव दिए ।

त्यस्तै सांसद योगेश भट्टराईले चिकित्सा शिक्षा क्षेत्रमा रहेको आरक्षणका बारेमा बिचार गर्नुपर्ने धारणा राखे ।

प्रतिक्रिया दिनुहोस्

LIVE TV