१० आश्विन २०७८, आईतवार

काठमाडौं । छैटौं संस्करणको एनभीए महिला तथा पुरुष क्लब भलिबल च्याम्पियनसीप आइतबारबाट सुरु भएको छ । नेपाल भलिबल संघको आयोजनामा भएको प्रतियोगिताको उद्घाटन खेलमा विभागीय टिम त्रिभुवन आर्मी क्लबले कर्णाली प्रदेशलाई ३–० को सोझो सेटमा पराजित गर्यो ।

राष्ट्रिय टोलीका खेलाडीले भरिएको आर्मीले कर्णालीलाई पहिलो सेटमा २५–८, दोस्रो सेटमा २५–१४ र तेस्रो सेटमा २५–७ ले पराजित गर्यो । यस जितसँगै आर्मीले पहिलो खेलमै ३ अंक जोडेको छ ।

कर्णालीले भने हारबाट प्रतियोगिताको सुरुवात गरेको छ । त्यस्तै आइतबार नै भएको अर्को खेलमा एपीएफले पुरुष तर्फ विजयी सुरुवात गरेको छ ।

आफ्नो पहिलो खेलमा एपीएफलाइ ढोरपाटन स्पोर्टस क्लवलाई तीन एकको सेटमा हरायो । त्रिपुरेश्वर स्थित राष्ट्रिय खेलकुद परिषद्को कर्भडहलमा भएको खेलमा एपीएफले ढोरपाटनलाई २५–१३, २५–१८, २६–२८ र १९–१३ को सेटमा हरायो ।

उपाधिको दावेदार टिममा रहेको एपीएफले पहिलो सेट २५–१३ ले जित्दा दोस्रो सेटमा २५–१८ को जित निकाल्यो । तर तेस्रो सेटमा ढोरपाटनले २८–२६ ले आफ्नो पक्षमा पार्यो । तर चौथो सेटमा कमब्याक गर्दै एपीएफले २५–१५ ले जित्न सफल भयो ।

प्रतियोगिता अन्तर्गत महिलातर्फको खेल भने मंगलबार सुरु हुनेछ । प्रतियोगितामा पुरुषतर्फ १२ टिम र महिलातर्फ ६ टिमको सहभागिता रहेको छ । प्रतियोगिताको विजेताले ४ लाख प्राप्त गर्दा उपविजेताले २ लाख पाउने छन् ।

तेस्रोले १ लाख प्राप्त गर्नेछ । त्यस्तै सर्वोत्कृष्ट खेलाडीले २५ हजार प्राप्त गर्दा विधागततर्फ उत्कृष्ट हुनेले १० हजार पाउने छन् । क्लब च्याम्पियनसीपबाट पुरुषतर्फ उत्कृष्ट ७ र महिलाको ५ टोलीले चैतमा आयोजना हुने क्लब लिगमा स्थान बनाउने छन् ।

प्रतिक्रिया दिनुहोस्

LIVE TV