७ भाद्र २०७८, सोमबार

रौतहट । सूचना सम्प्रेषणका वाहक हुन पत्रकार । आम जनतालाई सूसुचित गराउने अभिभारा नै राष्ट्रको यही चौथो अंगसँग छ । तर नेपालमा पत्रकार अझै पनि जोखिम र चुनौतीसँग पाइला पाइलामा लड्नु पर्ने अवस्था छ । आफूअनुकुल समाचार लेखाउने र आफूप्रतिकुल समाचार नजाओस् भन्ने जमात नेपालमा बढ्दो छ । त्यसैले पनि धेरै समाचार र विषय पत्रकारका लागि चुनौतीका पहाड नै बन्दै आएका छन् । रौतहटमा भएको एउटा घटनाले पनि समाचार लेखेको रिसमा नै पत्रकारलाई कसरी फसाइन्छ भन्ने पुष्टि भएको छ । त्यो पनि प्रहरीबाट ।

घटना यहीँ साउन ३२ गतेको हो । जिल्ला सदरमुकाम गौरबाट प्रहरीले बिआर ३० एस १८८५ नम्बरको भारतीय मोटरसाइकलमा लागूऔषध १ सय ५ थान नाइट्राभेटसहित दुईजनालाई पक्राउ गरेको थियो । पक्राउ पर्नेमा ईशनाथ नगरपालिका ८ का मोहम्मद मोजिबुल्लाह र राजपुर नपा ७ बस्ने शेख गुलाब भन्ने शेख अतिउल्लाह रहेका थिए । यी मध्ये मोजिबुल्लाह स्थानीय सञ्चारकर्मी पनि हुन् ।

सीसीटीभी हेर्दा खुल्याे रहस्य

शनिबार सो घटनाको सीसीटीभी फुटेज सार्वजनिक भएपछि प्रहरीनै मोजिबुल्लाहलाई फसाउँन मोटरसाइकलमा लागू औषध राखेको पोल खुलेको हो । शनिबार गौर नगरपालिकाको सभाहलमा नेपाल पत्रकार महासंघ रौतहट शाखाले सञ्चारकर्मीहरु माझ सार्वजनिक गरेको सीसीटीभी फुटेजमा प्रष्ट रुपमा जिल्ला प्रहरी कार्यालय रौतहटका सादा पोशाकका प्रहरी (घुमुवा) प्रहरी सहायक निरीक्षक उदयप्रसाद यादवको नेतृत्वमा रहेको प्रहरी टोलीले गौर स्थित होटल ग्रिन सिग्नल बाहिर पार्किङ्ग गरी खाजा खान गएका मोजिबुल्लाह मोटरसाइकलमा नाइट्राभेट राखेको देखिएको छ ।

भिडियोमा प्रहरी सहायक निरीक्षक यादव तथा प्रहरी जवान मनोज साहले स्थानीय दुई युवाहरु को सहयोगमा मोटरसाइकलमा लागू औषध मोटरसाइकलमा राख्न लगाएको देखिएको छ ।

 

आन्दोलनको चेतावनी

प्रहरीकै मिलोमतोमा नै लागूऔषध राखेर निर्दोष व्यक्तिलाई फसाएको भन्दै नेपाल पत्रकार महासंघ रौतहटले गम्भीर आपत्ति जनाएको छ ।

आम नागरिकलाई फसाउन प्रहरी आफै लागेको पुष्टि भएको भन्दै प्रहरीले यस घटनामा संलग्नजो कोहीँलाई पनि तत्काल कानुनी दायरामा ल्याएर कारवाही गर्नु पर्ने सञ्चारकर्मीहरुको माग छ ।

प्रहरी बोल्न अन्कनाउँदै

फिल्मी शैलीमा सर्वसाधरणलाई फसाउने यो घटना सार्वजनिक भएपछि पछि रौतहट प्रहरी यो विषयमा खुलेर बोल्न मानेको छैन् ।

यता सञ्चारकर्मी मोजिबुल्लाहको परिवार भने तीप्रहरी कर्मचारीहरु त केवल एक मोहरा भएको र यस घटनाको पछाडि ठूलै व्यक्तिहरुको हात हुन सक्ने अनुमान गर्दै आएका छन् ।

प्रहरीमा सूचना संकलनको लागि साधा पोसाकको प्रहरी (घुमुवा) परिचालन गर्ने चलन भएपनि यस्ता घुमुवाहरु देशभर बदनाम बन्न थालेको गुनासो बढ्दै गएको छ । तर प्रहरीले यस्ता घुमुवाको कार्यशैलीमाथि निगरानी भने बढाउन सकेको छैन ।

प्रतिक्रिया दिनुहोस्

LIVE TV