६ श्रावण २०७८, बुधबार

काठमाडौं । ‘तपाईँले किन राजीनामा दिनुभयो । अब, राजीनामा फिर्ता लिनुहोस्। राजीनामा फिर्ता लिएपछि बाँकी कुराहरु गरौँला । त्यसैले अब केही नभनिकन राजीनामा फिर्ता लिनुहोस् । राजीनामा दिने तपाईको अधिकार हो भनेर हामीलाई पनि थाहा छ तर, राजीनामा फिर्ता लिनुस् भन्ने पनि त हाम्रो अधिकार छ ।’

बुधबार नेकपा एमाले उपाध्यक्ष भीम रावललाई उनकै निवासमा टोखामा भेटेर वरिष्ठ नेता माधवकुमार नेपालले सम्झाईबुझाई गरे । राजीनामा दिए पनि अझैँ केही बिग्रिनसकेको र फिर्ता लिएर बाँकी कुराहरु गर्नुपर्ने पनि नेता नेपालले रावलसँग भने ।

नेता नेपालको कुरा सुनेपछि रावलले केही लचकता देखाए । तैपनि राजीनामा फिर्ताबारे पूर्ण विश्वास दिलाएनन् ।

साउन २ गते प्रधानमन्त्री शेरबहादुर देउवालाई विश्वासको मत दिन नेता नेपालले आफूनिकट सबै सांसदहरुलाई उर्दी जारी गर्दा रावल रिसाएका थिए । र, उनले सांसद पदबाटै राजीनामा दिएका थिए ।

पार्टी एकता गर्न १० बुँदे सहमति अन्तिममा अवस्थामा पुग्दा नेता नेपालको त्यस्तो निर्देशन पाएपछि रावलले मिडियासामू नै राजीनामा पत्र पढेर सुनाएका थिए । त्यसरात नेपालसहित २२ सांसदले प्रधानमन्त्री देउवालाई विश्वासको मत दिएका थिए ।

त्यसयता नेपाल र रावलको भेटघाट भएको छैन । बुधबार नेपालले आफूनिकट स्थायी कमिटीको बैठकका डाकेका थिए तर, रावल अनुपस्थित भएपछि भेट्न उनकै निवास टोखा पुगेका थिए ।

रावलको निवासबाट छुट्नअघि पनि नेपालले दायाँ बायाँ केही नसोचेर राजीनामा फिर्ता लिन सुझाव दिएका छन् ।

प्रतिक्रिया दिनुहोस्

LIVE TV