९ असार २०७८, बुधबार

काठमाडौं । काठमाडौंको दक्षिणकाली मन्दिरस्थित पार्किङसँगैको शौचालयमा हत्या गरेर फालिएकी महिलाको शवको पहिचान भएको छ । विभिन्न पशुपंक्षीको आवाज निकालेर भाइरल बनेकी महिला सन्तोषी सुब्बाको हत्या भएको प्रहरीले पुष्टि गरेको छ ।

उनको घर काभ्रे भएको प्रहरीले सूचना प्राप्त गरेको एक अधिकारीले जानकारी दिए । उनी कालोपुलमा एक धर्म बुबासँग बस्दै आएको प्रारम्भिक अनुसन्धानबाट खुलेको छ । उनको शव मंगलबार भेटिएको थियो ।

अनुहार चिन्न नसक्ने गरी लागेको चोटका कारण शव पहिचानमा समस्या भएको थियो । अर्धनग्न अवस्थामा फेला परेको शवको मुख चिन्न नसकिने गरी किचिएको थियो भने घाँटी कसिएको पाइएको थियो । घटनास्थलमा रुखको हाँगामा महिलाको मास्क, चप्पल भेटिएको थियो । प्रहरीले उनको हत्या भएको निष्कर्ष लागेको थियो ।

महानगरीय अपराध महाशाखा र प्रहरी परिसर काठमाडौंले अनुसन्धान अघि बढाएको छ । उनकाे टाउकोमा गह्राै वस्तुले हिर्काएको देखिएको प्रहरीले जनाएकाे छ ।

उपत्यका अपराध महाशाखाका प्रमुख एसएसपी चन्द्रकुवेर खापुङका अनुसार घटना लगत्तै त्रिवि शिक्षण अस्पताल, महाराजगञ्जबाट फरेन्सिक विज्ञसहितको टोली बोलाएर जाँच गरिएको थियो ।

प्रहरीले तालिम प्राप्त विशेषज्ञ कुकुर पनि घटनास्थलमा ल्याएको थियो । प्रहरी र चिकित्सकले उनी गर्भवती भएको हुनसक्ने आशंका गरेको छ । यद्यपि, पोष्टमार्टमपछि मात्रै यसको पुष्टि हुनेछ ।

प्रतिक्रिया दिनुहोस्

LIVE TV