१ असार २०७८, मंगलवार

काठमाडौँ । प्रमुख निर्वाचन आयुक्त दिनेशकुमार थपलिया र नेपालका लागि इजरायलका राजदूत हनान गोडेरबीच आज भएको शिष्टाचार भेटमा दुई देशका निर्वाचन व्यवस्थापन निकायबीचको आपसीे सम्बन्धबारे विचारविमर्श भएको छ ।

दुई देशबीच कुटनीतिक सम्बन्ध स्थापना भएको ६० औँ वर्षगाँठ मनाइरहँदा उहाँहरुबीच भएको भेटमा आगामी दिनमा दुवै निकायबीच सहयोगका नयाँ क्षेत्रहरुको पहिचान गरी आपसी सहयोग आदान–प्रदान गर्ने विषयमा समेत छलफल भएको आयोगका प्रवक्ता राजकुमार श्रेष्ठले जानकारी दिनुभयो ।

सो अवसरमा प्रमुख निर्वाचन आयुक्त थपलियाले दुई देशबीचको आपसी सम्बन्ध सुमधुर रहेको र आगामी दिनमा निरन्तर सहकार्य हुने बताउनुभयो । उहाँले प्रतिनिधिसभा सदस्य निर्वाचन, २०७८ तथा स्थानीय तह निर्वाचनको सन्दर्भमा समेत दुई देशका निर्वाचन व्यवस्थापन निकायका बीचमा आपसी अनुभव आदान–प्रदान हुने र सम्वन्ध थप मजबुत बनाउन सहयोग पुग्ने विश्वास व्यक्त गर्नुभयो ।

आयोगका सचिव सुरेश अधिकारीले नेपालको निर्वाचन प्रणाली, पद्धति, प्रक्रिया, चरण र निर्वाचन व्यवस्थापनका विभिन्न आयामका सम्बन्धमा जानकारी गराउँदै अन्य क्षेत्रको सहयोगका अतिरिक्त निर्वाचनका क्षेत्रमा दुवै देशका निर्वाचन व्यवस्थापन निकायबीचमा आपसी सहयोग गर्न सकिने बताउनुभयो ।

प्रतिक्रिया दिनुहोस्

LIVE TV