२३ पुष २०७७, बिहीबार

काठमाडौं, २३ पुष । राष्ट्रिय सभा सदस्य तथा नेकपा उपाध्यक्ष वामदेव गौतमले आफू अझै पार्टी एकताका लागि प्रयासरत रहेको बताउनुभएकाे छ ।  राष्ट्रियसभा दोस्रो हिउँदे अधिवेशनमा बोल्दै उपाध्यक्ष गौतमले यस्तो बताउनुभएकाे हाे ।

गौतमले एकता अपरिहार्य रहेको पनि बताउनुभयाे । उहाँले भन्नुभयाे,  ‘एक्लै एकताको माहोल बनाउन सकिन्नँ कि भनेर म संगठनात्मक संरचना निर्माण गरेर पनि जाने पक्षमा छु । र मलाई लाग्छ- पार्टीको बीचमा एकता अपरिहार्य छ ।’

गौतमले अहिले विभाजित रहेको पार्टीमा आफू कुनै पक्षमा नरहेको पनि प्रष्ट पार्नुभयाे । उहाँले भन्नुभयाे, ‘आज हाम्रो पार्टी दुई समूहमा विभाजित छ। म कुनै पनि समूहमा छैन। मैले विचार गरें- तीन वर्षमै विभाजन गर्नु थियो भने किन एकता गरेको ?’

गौतमले प्रधानमन्त्री ओलीको कार्यशैलीको कारणले पार्टी एकता संकटमा पुगेको पनि बताए । उहाँले भन्नुभयाे, ‘नेकपा विभाजित छ, कुनै औचित्य देख्दिनँ । पार्टी सचिवालयको नाताले धेरै कुरा उठाएँ, नेताहरूको कार्यशैलीमाथि पनि प्रश्न उठाएँ ।  तर, सुधार भएन, आफू विरोधीजस्तो मात्रै भएँ । अविश्वासको प्रस्तावका बार पनि आफ्नै पार्टीका नेताहरूले ल्याउलान्, सोचेको थिइनँ ।’

प्रधानमन्त्री ओलीविरुद्ध अविश्वासको प्रस्ताव लैजाँदै गर्दा आफूलाई अध्यक्ष पुष्पकमल दाहाल प्रचण्ड पक्षले नसोधेको गैतमले बताउनुभयाे । अविश्वास प्रस्तावबाट आफ्नै पार्टीको नेतालाई पराजित गर्ने यस्तो किसिमको काम होला भनेर मैले सोचेको थिइनँ । र, गएको ८/९ महिनादेखि मैले निरन्तर आलोचना गर्ने समुहभित्र बसेर पनि पार्टी एकतालाई जोगाउनको निम्ति मैले अविश्वसको प्रस्तावलाई असफल गराएकाे थिएँ ,’ उहाँले भन्नुभयाे, ‘तर पुष ५ गते अविश्वासको प्रस्ताव लग्दा मलाई थाहा थिएन ।’

प्रधानमन्त्री ओलीको कारणले पार्टीभित्र पटक-पटक समस्या निम्तिएको र प्रतिनिधि सभा विघटन गर्दा आफूलाई नसोधेको पनि गाैतमले बताउनुभयाे । ‘प्रधानमन्त्रीको म आलोचक हुँ , उहाँको कार्यशैलीले नै हाम्रो पार्टीमा धेरै विवाद उत्पन्न भए,’ गैतामले भन्नुभयाे, ‘उहाँ मेरो ४३ वर्षदेखिको सहयोद्धा पनि हो, मेरो मित्र पनि हो । र उहाँलाई मैले धेरै पटक सुझाव पनि राखेको छु, यो सुधार्नु पर्छ भनेर । उहाँ दुई पटक प्रधानमन्त्री हुँदा मेरा धेरै सुझावहरु पनि मान्नु भएको छ । तर यसपटक संसद विघटनमा मलाई सोध्नुभएन ।’

प्रधानमन्त्री ओलीले पार्टी एकता जोगाउनका लागि राजीनामा दिनुपर्ने उहाँले बताउनुभयाे । ‘मलाई प्रधानमन्त्रीबाट हटाउने प्रयास भयो भने दुर्भाग्य हुन्छ भन्नुभयो । उहाँले पार्टी एकता जोगाउनका लागि राजीनामा दिनुपर्थ्याे । पार्टीभित्र अल्पमतमा परेपछि राजीनामा दिनुपर्छ,’ गाैतमले भन्नुभयाे,  ‘कम्युनिस्ट आन्दोलनलाई जोगाउन चाहेको भएमा ओलीले राजीनामा दिनु उचि हुन्थ्याे ।’

उपाध्यक्ष गौतमले आफू प्रधानमन्त्री भएको भए अविश्वास प्रस्ताव आउनुअघि नै राजीनामा दिने पनि बताउनुभयाे । ‘म प्रधानमन्त्री भएको भए, त्यो अविश्वासको प्रस्ताव दर्ता हुनुअघि नै राजीनामा दिन्थें,’ उहाँले भन्नुभयाे, ‘त्यसैले मैल समर्थन गरिनँ । असंवैधानिक भनें । अहिले चुप लागेको छु किनभने यो मुद्दा अदालतमा छ ।’

नेता गाैतमले आफू कुनै पनि पक्षमा नलाग्ने बताउँदै भन्नुभयाे, ‘दुवै पक्षका नेताहरु एक अर्काविरुद्ध खनिएका छन् । म कतैपनि लाग्दिन । पार्टी एकतालाई पुनः  जोड्न सक्ने सम्भावनाका साथ लागिरहेको छु ।’

नेकपा राजनीतिक रुपमा विभाजित भएको र कानुनी रुपमा के हुने हाे भन्ने प्रतीक्षाको विषय रहेको उहाँले बताउनुभयाे । ‘अदालतमा ऋषि कट्टेलले मुद्दामा जिते भने के होला ? एउटा पक्ष नेकपा एमाले र अर्को पक्ष नेकपा माओवादी हुने होला,’ गाैतमले भन्नुभयाे ।

पार्टीमा संघर्ष र अन्तरसंघर्ष स्वाभाविक भएको गौतमकाे भनाइ थियाे । उहाँले देखा परेका समस्यालाई सही ढंगले निकास दिने नेता हुने बताउनुभयाे । उहाँले दुइवटा पक्षका नेताहरु नै समाजवादी सभ्यता निर्माण गर्छौं भन्नेहरुलाई नै लाज लाग्नेगरी उत्रिएको भन्दै आलोचना गर्नुभयाे ।

प्रतिक्रिया दिनुहोस्

LIVE TV