शेयर बजार विस्तार हुँदै



प्रकाशित मिति : Nov 21, 2020

बुटवल, ६ मंसिर । लुम्बिनी प्रदेश सरकारले बुटवलमा शेयर बजारको क्षेत्रलाई विस्तार गर्ने तयारी गरिरहेको छ । नेकपा लुम्बिनी प्रदेशसभाका प्रमुख सचेतक भूमिश्वर ढकालले प्रदेशको राजधानी भालुवाङ सरे पनि धितोपत्र बोर्डको कार्यालय बुटवलमा स्थापना गरेर आर्थिक क्षेत्रको विकासमा जोड दिइने बताउनुभयो । उहाँले प्रदेशमा शेयर बजारको दायरा फराकिलो बनाउने गरी प्रदेश सरकारले काम गरिरहेको जानकारी दिनुभयो ।आज रुपन्देहीको सैनामैनामा व्यापार सङ्घले आयोजना गरेको संस्थाको पाँचौँ अधिवेशनमा उहाँले लुम्बिनी प्रदेशमा शेयर बजारको सम्भावना रहेकाले प्रदेश सरकारले शेयर बजारलाई प्राथमिकतामा राखेर काम गरिरहेको जानकारी दिनुभयो । प्रमुख सचेतक ढकालले भन्नुभयो, “यस क्षेत्रमा बजारको राम्रो सम्भावना छ, राजधानी दाङ गए पनि समस्या हुँदैन, सरकार लगानीकर्ता र व्यवसायीको हितका लागि प्रतिबद्ध छ ।” पूँजी बजारको विस्तारका लागि छरिएर रहेको पूँजी वा सानो–सानो बचतमार्फत ठूला आयोजना निर्माण गर्न सकिने ढकालको भनाइ छ ।

उहाँले भूमिहीन, सुकुम्बासी र अव्यवस्थित बसोबासको समस्या समाधानका लागि रुपन्देहीको कञ्चन गाउँपालिकाबाट कामको थालनी भएको जानकारी गराउँदै सो समस्या छिट्टै समाधान हुनेमा प्रतिबद्धता व्यक्त गर्नुभयो । प्रदेशसभा सदस्य कमला विश्वकर्माले कोरोना सङ्क्रमणका कारण देशको अर्थतन्त्रमा नराम्रो असर परेको बताउँदै देशको अर्थतन्त्रको विकासका लागि उद्योगी व्यवसायीको सहभागिता अपरिहार्य रहेको बताउनुभयो ।

सैनामैना नगरपालिकाका नगरप्रमुख चित्रबहादुर कार्कीले संस्थाको भवन निर्माणका लागि नगरपालिकाले छिट्टै नै जग्गा उपलब्ध गराउने प्रतिबद्धता व्यक्त गर्नुभयो । कार्यक्रममा नेकपाका सैनामैना संयोजक चेतनारायण न्यौपाने, नेपाली काँग्रेसका नगर सभापति रामप्रसाद अधिकारी, तिलोत्तममा व्यापार सङ्घका अध्यक्ष जेपी कँडेललगायतले बोल्दै व्यवसायीहरुको हित र व्यवसाय प्रवद्र्धनका लागि तीनै तहका सरकारले महत्वपूर्ण भूमिका रहने बताउनुभयो ।


प्रतिक्रिया दिनुहोस्
Copyright © 2018 All rights reserved by NBC.
Designed by appharu.com