तनहुँको व्यास नगरपालिकामा भोलि दिउँसोदेखि एक साता लकडाउन

• सविन लामिछाने

दमौली, ३२ साउन । व्यास नगरपालिकाले एक साताको लागि लकडाउन गर्ने भएको छ । समुदाय स्तरमा कोरोनाको उच्च जोखिम देखिए सँगै सोमबार दिउँसोको १२ बजे देखि लकडाउन गरिने भएको छ ।आइतबार नगरपालिकामा सर्वपक्षीय वैठकले नगरपालिका एक साताको लागि लकडाउन गर्ने निर्णय गरेको हो । व्यास १ भादगाँउकी एक ६९ वर्षीया वृद्धामा कोरोना संक्रमण पुष्टि भएपछि परिवारका सदस्यको परीक्षणका क्रममा थप पाँचजनामा कोरोना संक्रमण देखिएको हो ।नगरपालिकामा पनि समुदाय स्तरमा कोरोना देखिएपछि एक साता लकडाउन गर्ने निर्णय गरेको नगरप्रमुख वैकुण्ठ न्यौपानेले जानकारी दिनुभयो। उहाँले भन्नुभयो, “ केही दिन अघि छिमेकी भानु नगरपालिकामा कोरोना सामुदाय स्तरमा देखिएपछि यस पालिकामा पनि जोखिममा रह्यो । त्यसपछि यहि पालिकामा पनि समुदाय स्तरमा कोरोना देखिएपछि जोखिम न्यूनीकरण गर्न लकडाउन गर्ने निर्णय गरेका हौं । ”

गत चैत ११ देखि जारी गरिएको लकडाउन असारमा खुल्ना साथ बजारमा भीडभाड बढ्नाले कोरोनाको जोखिम निम्त्याएको उहाँले बताउनुभयो । लकडाउन अवधिमा नगरभित्र स्वास्थ्य सेवा र सरसफाई बाहेक अन्य सेवा पूर्ण रुपमा बन्द गरिने उहाँले बताउनुभयो । उहाँले भन्नुभयो,“लकडाउनको अवधिमा समुदाय स्बाब संकलनलाई पनि तीव्रता दिईने छ । कन्टयाक्ट टे«सिङबाट स्वांब संकलन गरि जोखिम कम गर्ने छौं । ”

लकडाउनको पालना गदै सबैलाई घरमै बस्न नगरप्रमुख न्यौपानेले आग्रह गर्नुभयो । यस्तै नगर भित्रका सबै टोल विकास संस्थाहरुले निगरानी गरी शङकस्पद अवस्था देखिएमा तत्काल नगरपालिकाको स्वास्थ्य शाखामा सुचना दिन आग्रह गरिएको छ । यसैबीच आँबुखैरेनी गाँउपालिकाले पनि एक साता अत्यावश्यक सेवा बाहेक अन्य सेवाहरु बन्द गर्ने भएको छ ।

गाँउपालिकाको छिमेकी पालिकाहरुमा समुदाय स्तरमा कोरोनाको जोखिम बढेकोभ भन्दै गाँउपालिकाले पनि एक साताका लागि अत्यावश्यक सेवा मात्र संचालन गर्ने निर्णय भएको गाँउपालिका अध्यक्ष गिरबहादुर थापाले बताउनुभयो ।