२८ श्रावण २०७७, बुधबार
  • सन्तोष काफ्ले,

सुनसरी, २८ साउन । वीपी कोइराला स्वास्थ्य विज्ञान प्रतिष्ठान, धरानको सिनेट बैठक स्थगितलगाएतका माग गर्दै नेपाली कांग्रेस निकट तरुण दल र नेपाली विद्यार्थी संघ (नेविसंघ)ले संयुक्त प्रदर्शन गरेको छ ।

बुधबार प्रतिष्ठानको सिनेट बैठक स्थगितसँगै कोभिड अस्पताल तत्काल सञ्चालनमा ल्याउनु पर्ने माग राख्दै तरुण दल र नेविसंघले प्रतिष्ठानको मुख्य प्रवेश द्वारमा संयुक्त प्रदर्शन गरेको हो ।

उनीहरुले प्रतिष्ठानका उपकुपति प्राध्यापक डाक्टर ज्ञानेन्द्र गिरीले प्रतिष्ठान सुधारमा ध्यान नदिएको आरोप लगाएदै प्रतिष्ठानमा रहेको बेथिति हटाउन र सर्वसुलभ उपचारको व्यवस्था गर्न माग गरेका छन् ।

त्यस्तै, उनीहरुले उपकुपतिसँगै प्रतिष्ठानका पदाधिकारीहरु समेत कोरोना महामारी समयमा उपचारको व्यवस्था मिलाउन छोडेर गैर–जिम्मेवार बन्दै गएका आरोप लगाएका छन् ।

धरान १८ बुद्ध चोकबाट नारा जुलुससहित प्रतिष्ठानको मुख्य प्रवेशद्वार पुगेका तरुणदल र नेविसंघका कार्यकर्तालाई प्रहरीले रोकेको थियो । सोही क्रममा केही बेर प्रहरीसँग ठेलामठेल समेत भएको थियो ।

प्रहरीले उपकुलपतिको कार्यकक्षतर्फ जान नदिएपछि उनीहरुले मुख्य प्रवेशद्वार भित्र विरोधसभा गरेका थिए ।

प्रतिक्रिया दिनुहोस्

LIVE TV