२८ श्रावण २०७७, बुधबार
  • हरिशंकर शर्मा/इरफान अली,

वीरगञ्ज, २८ साउन । वीरगञ्ज महानगरपालिकाले कोरोना परीक्षणका लागि नारायणी अस्पताललाई दिएको पीसीआर केमिकलमा गडबडी देखिएको छ ।

वीरगञ्जमा कोरोना संक्रमितहरुको संख्या बढ्न थाले पश्चात एक घर एक पीसीआर परीक्षण अभियान अन्तर्गत महानगरपालिकाले दिएको विभिन्न कम्पनीको पीसीआर केमिकल मध्ये एउटा कोरियन कम्पनीको केमिकलमा गडबडी देखिएको हो ।

केमिकलमा गडबडी देखिएपछि १२ सय स्वाब काठमाडौं पठाइयो

नारायणी अस्पतालमा दैनिक पीसीआर परीक्षण गर्दै आएकोमा साउन २६ गते उक्त कोरियन कम्पनीको पीसीआर केमिकलबाट परीक्षण गर्दा गड्बडी देखिएको अस्पतालका मेडिकल सुपरिटेण्ड डा। मदन उपाध्यायले जानकारी दिनुभयो ।

परीक्षणको क्रममा केमिकलमा गड्बडी देखिएपछि नारायणी अस्पताल लगायत वीरगञ्ज महानगरको मास टेस्टिङ्ग तथा एक घर एक पीसीआर परीक्षण अभियान अन्तर्गत साउन २६ तथा २७ गते संकलन गरिएको करिब १२ सय स्वाब परीक्षणको लागि काठमाडौंको प्रयोगशालामा पठाइएको मेसु उपाध्यायले बताउनुभयो ।

पूरानै कम्पनीको केमिकल मगाएर भोलिदेखि परीक्षण

उहाँका अनुसार नारायणी अस्पतालले संघ सरकारले पठाएको तथा वीरगन्ज महानगरपालिकाले उपलब्ध गराएको विभिन्न १२ कम्पनीका पीसीआर केमिकल प्रयोग गर्दै आएकोमा एउटा कम्पनीको केमिकलले मेशिनमा फिट नभएको कारण रिपोर्ट शंकास्पद आएपछि संकलन गरिएको स्वाब परीक्षणका लागि काठमाडौंको प्रयोगशालामा पठाइएको हो ।

केमिकलमा गडबडी भएसँगै नारायणी अस्पतालको पीसीआर परीक्षण कार्य रोकिएको छ । यसमा प्रयोग भइरहेको कम्पनीकै केमिकल ल्याउनका लागि एम्बुलेन्स काठमाडौं पठाइएको छ । मेसु उपाध्यायले आज भोलिसम्म केमिकल आईपुग्ने र पुनः यहाँको मेशिनमा परीक्षण कार्य शुरु हुने जानकारी पनि दिनुभयो ।

अस्पतालका कर्मचारीले केमिकल बदले : मेयर सरावगी

यता वीरगञ्ज महानगरपालिकाका मेयर विजय सरावगीले यति दिन पछि केमिकलमा गडबडी रहेको भन्नु अस्पतालको गैरजिम्मेवारी रहेको बताउनुभयो ।

उहाँले विभिन्न कम्पनीको केमिकल टेण्डर मार्फत खरिद गरेर नारायणी अस्पताललाई उपलब्ध गराएकोमा करिब एक महिना हुन लाग्दा अहिले आएर केमिकलमा गडबडी भएको भन्नुले अस्पतालका कर्मचारीले नै केमिकल बद्लेको हुन सक्ने आशंका गर्नुभयो ।

वीरगञ्जमा कोरोना संक्रमण बढ्दै गएपछि वीरगञ्ज महानगरपालिकाले स्थानीय उद्योगी, व्यापारी तथा नागरिकहरुसँग चन्दा संकलन गरेर नारायणी अस्पताललाई पीसीआर मेशिन तथा त्यसमा प्रयोग हुने केमिकल र अन्य सामानहरु प्रदान गरेका थिए ।

करिब १ करोड ७५ लाख रुपैया चन्दा संकलन गरेर खरिद गरिएको पीसीआर मेशिन एक कार्यक्रमबीच प्रदेश २ का मुख्यमन्त्री लालबाबु राउतले नारायणी अस्तपालका मेडिकल सुपरिटेण्ड डा. मदन उपाध्यायलाई हस्तान्तरण गर्नुभएको थियो ।

प्रतिक्रिया दिनुहोस्

LIVE TV