महिला अधिकारको नाम भजाएर गलत आक्षेप प्रमाणित गराउँन खोज्नु भ्रम हो : अभिनेता भुवन केसी



प्रकाशित मिति : Aug 01, 2020

काठमाडौं, १७ साउन । अग्रजहरुको सम्मान गर्ने संस्कार पछिल्लो पुस्ताका कलाकर्मीमा कम हुँदै गएको अभिनेता भुवन केसीले बताउँनु भयो । पछिल्लो पटक अभिनेत्री साम्राज्ञी राज्यलक्ष्मी शाहसँगको विवादलाई लिएर उहाँले आफुलाई जिन्दगीमा कसैले पनि नलगाएको आरोप अहिले लगाइएको भन्दै दुखेसो पोख्नु भयो । रोमान्स गर्ने उमेरमा समेत कसैले यस्तो आरोप नलगाएको भन्दै छोराको नायिकाले लगाएको यो आरोप सिनियर कलाकार प्रतिको अपमान भएको बताउँनु भयो ।

न्यूज २४ टेलिभिजनको नियमित कार्यक्रम ६ प्रश्नमा कुरा गर्दै अभिनेता केसीले ‘चलचित्र क्षेत्रमा ४० वर्ष बिताउँदै गर्दा जुन शब्द म माथि प्रयोग भयो, के मैले चलचित्र क्षेत्रमा बिताएको ४० वर्ष यसैका लागि हो त ? भन्ने प्रतिप्रश्न गर्नुभयो ।

‘तपाईका समकालीन शिव श्रेष्ठ, राजेश हमाल लगायतका अभिनेताहरु कहिलै यस्ता विवादमा आउँनु हुन्न् तर तपाई किन मुछिनु हुन्छ, त्यो पनि महिलाहरु कै सन्दर्भमा रु’ भन्ने कार्यक्रम प्रस्तोता राजिब खत्रीको प्रश्नमा केसीले आफुले धेरै रोमान्टिक चलचित्रमा अभिनय गरेका कारण अरुमा त्यस्तो छाप पर्न गएको बताउँनु भयो । केसीले आफु सरल र महिलाको सम्मान गर्ने व्यक्तिको रुपमा रहेको बताउँनु भयो । केसीले अर्को एक प्रश्नको जवाफ दिँदै महिला अधिकारको नाम भजाएर गलत आक्षेप प्रमाणित गराउँन खोज्नु भ्रम रहेको समेत बताउँनु भयो ।

अभिनेत्री साम्राज्ञी राज्यलक्ष्मी शाहले जो जससँग सम्बन्ध छ भन्दै सामाजिक सञ्जालमा पोष्ट गरेको स्टाटसमा नेपाली चलचित्र क्षेत्रको विकासका लागि सबै निर्माता पक्षपातपूर्ण व्यवहार र गुटबन्दीबाट बाहिर निस्किनु पर्छ भनेसँगै वहस, विवाद हुँदै अदालतसम्म मुद्दा पुगेको छ । साम्राज्ञीले आफूले चलचित्रमा काम गर्ने क्रममा तीन वटा ब्यानरबाट निकै दुःख पाएको भन्दै इन्स्टाग्राममा भिडियो सार्वजनिक गर्नुभएको थियो । त्यसमा भुवन केसीले जवाफ दिएपछि विवाद चर्केको थियो । साम्राज्ञीले जापानको एक अवार्डमा आफूसँग गाला जोडेर बोल्न खोजेको, अंकमाल गरेको थप आरोप भुवनमाथि लगाउँनु भएको थियो । यसपछि, अभिनेता केसीले आफ्नो प्रतिष्ठामा आँच पुर्याउने काम गरेकाले कानुनको सहारा लिन बाध्य भएको बताउँनु भयो ।
कुराकानी विस्तृतमा


प्रतिक्रिया दिनुहोस्
Copyright © 2018 All rights reserved by NBC.
Designed by appharu.com