डेरी व्यवसायले फेरिएको कार्कीको जीवन



प्रकाशित मिति : Jul 23, 2020
  • विवेक राई,

भोजपुर, ८ साउन । भोजपुर नगरपालिका–७ का ज्ञान कार्की (रमेश)ले २०६७ सालमा गाई पालन व्यवसाय शुरु गरेका थिए । दुवईमा ४ वर्ष बसेका कार्कीले विदेशमा गरेको दुःखलाई सम्झेर स्वदेशमै केही गर्न सकिन्छ कि भन्ने सोचाईका साथ ईलामबाट जर्सी र होलस्टन जातका ११ वटा गाई ल्याएर व्यवसाय शुरु गरेका थिए ।

व्यवसाय सञ्चालनका लागि उनले तीन जना युवाहरुलाई मासिक ११ हजारको दरले ज्याला दिएर राखेका थिए । गाई व्यवसायबाट उत्पादित दुधबाट राम्रो आम्दानी लिन थालेको केही वर्षपछि आफ्नो फर्मबाट उत्पादन भएको दुध विक्री हुन छोड्यो । त्यस्तै, उनले आफूसँग भएको गाईलाई खोरेत रोगका कारण उपचार तथा विज्ञ प्राविधिकको अभावले धेरै गाई गुमाए ।

स्थानीय बहु उद्देश्यीय सहकारी संस्था मार्फत् गाईको बीमा गराएका कार्कीले क्षतिपूर्ति समेत पाएनन् । त्यसपछि उनले गाई फर्म छाडेर गाउघरको दूध संकलन गरी श्री गणेशथान दुग्ध डेरी सञ्चालन गर्ने योजना बनाएर २०६९ सालबाट डेरी सञ्चालन सुरु गरे ।

सुरुमा कार्कीले एउटा प्लाष्टिकको बाल्टी र एउटा टेबल राखेर व्यवसाय थालेका थिए । डेरी सञ्चालन गरेको केही महिनापछि कार्कीलाई जिल्ला कृषि कार्यालयबाट ५० प्रतिशत अनुदानमा दूध संकलन गर्ने फ्रिज बक्स प्राप्त भयो ।

आफूसँग भएको बजेट सबै डेरी सञ्चालनमा लगाएका कार्कीलाई कतै व्यवसाय नचल्ने पो होकी ? भन्ने चिन्ता पनि उत्तिकै थियो । तर, समय वित्दै जादा तत्कालीन जिल्ला कृषि कार्यालय र उन्नति परियोजनाले डेरी सञ्चालन सम्बन्धी पोखरा, सुनसरीमा दिएको आधारभुत तालिमले उनलाई व्यवसाय सञ्चालन गर्न झन उर्जा थप्यो ।

नाफा–घाटा व्यहोर्दै २०७३÷७४ सालमा दैनिक १५० लिटर भन्दा बढी दूध संकलन गरी आफ्नो डेरीबाट बेच्न थालेका कार्कीको मासिक ४० देखि ४५ हजारसम्म आम्दानी हुन थाल्यो । दूधसँगै उनले दूधका परीकारहरु दही, छुर्पी, घ्यू, पनिर, खुवा, चिज, पुस्टकारीसमेत बनाउन थाले ।

कोरोना भाइरस महामारीका कारण गरिएको लकडाउनमा पनि उनी भोजपुर नगरपालिकाका विभिन्न वडाहरुमा पुगेर दूध संकलन गर्नुका साथै संकलित दूधलाई आफ्ना ग्राहकका घर–घरमा पु¥याउँदै आएका छन् ।

पछिल्लो समय ग्राहकको माग पु¥याउन नसकेका कार्कीले दूध संकलनका लागि आवश्यक सामग्री जोडिसकेको बताउदै बजारको माग पूरा गर्न भोजपुर नगरपालिका १ आख्रेमा १४ रोपनी जग्गा खरिद गरी गाई फर्मको लागि तयारी गरिरहेको जानकारी पनि गराएका छन् ।

जिल्लाका अधिकांश सडकहरु हिलाम्मे भएका कारण पनि सोचेजति दूध संकलन गर्न नसकेको कार्की बताउँछन् । मासिक ५५ हजारदेखि ६५ हजारसम्म आम्दानी भइरहेको कार्की बताउँछन् ।

विहान ४ बजेदेखि साँझसम्म डेरीमा दूध तथा दूधका परिकार बेच्न कार्कीसँगै उनका श्रीमतिलाई भ्याई नभ्याई हुने गरेको छ । उनले डेरीकै आम्दानीले तीनतले पक्की घरसमेत बनाई सकेका छन् ।


प्रतिक्रिया दिनुहोस्
Copyright © 2018 All rights reserved by NBC.
Designed by appharu.com