२० असार २०७७, शनिबार
  • शितल भट्ट 

कञ्चनपुर, २० असार । बेलौरी-कलुवापुर सडक खण्डको काम अलपत्र अवस्थामा छ । ठेकेदारको लापरबाहीका कारण उक्त सडक खण्डकाे काम अलपत्र परेको हाे ।

सडक निर्माणको ठेक्का पाएकाे सन्ताेषी थेगिम जेभि निर्माण कम्पनीकाे चरम लापरबाहीका कारण बेलौरी-कलुवापुर सडक खण्डको काम अलपत्र परेको नेपाली काङ्ग्रेसका युवा नेता एवं महाधिवेशन प्रतिनिधि हरेन्द्र सिंह बिष्टकाे भनाइ छ । निर्माण कम्पनीले सडक कालेपत्रेकाे ठेक्का पाएपश्चात काममा ढिलाइ गर्दै पटकपटक म्याद थपेर राज्यको ढुकुटी रित्याउनुबाहेक दाेस्राे काम नगरेकाे उनको कथन छ ।

निर्माण कम्पनीले २०७३ भाद्र १७ गते ठेक्का सम्झौता गरी २०७५ जेष्ठ १६ गतेभित्र निर्माण कार्य सम्पन्न गरिसक्ने सम्झौता गरेको थियो । तर झण्डै चार वर्ष गुज्रिसक्दा समेत ठेकेदारले जनता ठग्ने कामबाहेक अरु केही नगरेको उनले जिकिर गरे ।

निर्माण कम्पनीले २०७५ जेष्ठ १६ गतेभित्र निर्माण कार्य सम्पन्न गरिसक्नुपर्ने भए तापनि काम कछुवाको गतिमा भइरहेकाले दक्षिणी क्षेत्रका वासिन्दाले चिन्ता व्यक्त गरेका छन् ।

यस्तै, निर्वाचित सांसद तथा जनप्रतिनिधिहरुलाई यस विषयमा चिन्ता र चासो नहुनुले जनतामा नैराश्यता छाएको तथा भनेजस्तो जनप्रतिनिधि नपाउनुले यस क्षेत्रको भविष्य ओरालो लागेको नेकपा युवा नेता पल्लवराज भट्टकाे ठहर छ ।

नेता भट्ट भन्छन्, ‘कलुवापुर बेलौरी सडक खण्डलाई प्रदेश सरकारले गौरवको योजनामा राख्नु स्वागतयोग्य हाे । तर यसलाई प्रदेशको स्रोतले तत्काल सम्पन्न गर्न नसक्ने भएकोले उक्त सडक खण्डलाई हुलाकी राजमार्ग अन्तर्गत राखिनुपर्छ ।’

संघर्ष गर्नुपर्छ : पूर्वसांसद विष्ट

यस्तै, नेपाली कांग्रेसका जुझारु नेता एवं पूर्वसांसद दिवान सिंह विष्टले आफ्नो कार्यकालमा आफूले हालेको सडक कालोपत्रेकाे याेजना हालसम्म पनि सम्पन्न हुन नसक्नुमा राजनीतिक खिचातानी भएको जिकिर गरे । उनले बेलौरी-कलुवापुर सडक खण्ड हालसम्म बहुवर्षे ठेक्काको समय सकिँदा पनि सडक कालोपत्रेकाे काम अलपत्र परेको बताए । बेला बेलामा विभिन्न नेकपाका सांसद तथा मन्त्रीहरुबाट सडक कालोपत्रे शिलान्यास कार्य मात्रै हुनु तर कामकाे गतिलाई अगाडि बढाउनतर्फ बेवास्ता गर्नु निन्दनीय भएको उनकाे भनाइ छ ।

यहाँबाट निर्वाचित खानेपानी मन्त्री बिना मगरले सडकहरुको विभाजनका बेलामा यसलाई संघीय सरकारमा रहेर संघीय सरकारकै बजेटबाट निर्माण कार्य अगाडि बढाउन नसक्नु दु:खद रहेको उनको भनाइ छ । पूर्वसांसद बिष्टले कलुवापुर-बेलौरी सडक खण्डलाई अलपत्र पार्नमा वर्तमान सरकारबाट नै कथित भूमिका खेलिएकाले प्रमुख प्रतिपक्षी दल नेपाली काँग्रेसले कामलाई द्रुतगतिमा अगाडि बढाउन अब संघर्षका कार्यक्रम नगरी नहुने अवस्था सृजना भएको समेत बताए ।

‘ठेकेदारमाथि कारबाही हुनुपर्छ’

दक्षिणी क्षेत्रकाे विकास र समृद्धिसँग ठेकेदारले खेलबाड गरिरहेकाले यसलाई कडाभन्दा कडा कारबाही गर्नुपर्ने बुद्धिजीवी एवम् स्थानीय अगुवा प्रेम सिंह बाेहराकाे भनाइ छ । कामभन्दा पनि कुरा मात्रै गर्ने निर्माण कम्पनीको लाचारी प्रवृत्ति प्रति उनलेे चिन्ता व्यक्त गरे ।

भन्सारसम्म डबल लाईनको बनाउनुपर्ने

अलपत्र अवस्थामा रहेको निर्माण कार्य हाल आएर प्रदेशमा पठाइएको भए पनि प्रदेशको श्रोतले उक्त सडक तत्काल बन्न सम्भव देखिएको छैन । पुरानो डिपिआर अनुसार ५.५ मिटरलाई परिवर्तन गरी राजमार्गदेखि बेलौरीको बैशाखा भन्सारसम्म डबल लाईनको सडक बनाए मात्रै यस क्षेत्रको भविष्य उज्जवल देखिएकाे बुद्धिजीवी पूर्व प्राचार्य केशवराज जाेशीकाे भनाइ छ । साथै, भन्सार नाकाको सम्भावना पनि यस सडकसँगै जोडिएको उनकाे ठहर छ ।

कैलालीकाे लम्की-टीकापुर-खक्रौला लिंक रोड हुलाकी सडक परियोजना अन्तर्गत निर्माण भइरहेको हुँदा सोहीअनुसार कञ्चनपुर जिल्लाको एक मात्र उत्तर-दक्षिण जोड्ने कलुवापुर-बेलौरी लिंक रोड हुलाकी सडक परियोजनाअन्तर्गत राखी डबल लाइनको सडक निर्माण गरिनु पर्ने स्थानीय विज्ञहरुको सुझाव समेत आएको छ । भने कत्तिले त अहिले ठेक्का सम्झौता अनुसार ५.५ मिटर नै भए पनि चाडो भन्दा चाडाे काम सम्पन्न गरिनु पर्ने धारणा राखेका छन् ।

निर्माण कम्पनीले कलुवापुर देखि ५.५ मिटर सडक कालोपत्रे गर्दै आइरहेको भए तापनि वनसाहा-बेलौरीसम्मको उक्त सडक खण्डमा सिन्को समेत नभाँचेको स्थानीयहरुको गुनासो छ ।

ठेकेदारले दक्षिणी जनतालाई पटक-पटक झुटा आश्वासन दिएर विकास निर्माणमा खेलबाड गरकाे भन्दै बेलाैरीवासी अहिले झनै आक्राेशित भएका छन् । उनीहरुले अब चरणबद्ध रुपमा संघर्षका कार्यक्रम गर्ने सडक संघर्ष समिति संयाेजक महादेव पाण्डेले बताए ।

के-कति कारणले काममा ढिला-सुस्ती भइरहेको हाे ? यसबारेमा स्थानीय सरकारले ठाेस कदम चाल्नुपर्ने नेपाली काङ्ग्रेसका जिल्ला सदस्य प्रकाश राज पन्तको भनाइ छ ।

प्रतिक्रिया दिनुहोस्

LIVE TV