२ असार २०७७, मंगलवार

काठमाडौं, २ असार । नेपाल शेयर मार्केट्स एण्ड फाइनान्स लिमिटेडका तत्कालीन अध्यक्ष योगेन्द्रप्रसाद श्रेष्ठविरुद्ध सम्पत्ति शुद्धीकरण अनुसन्धान विभागले २ अर्ब ६६ करोड ६१ लाख रुपैयाँ गैरकानूनी सम्पति आर्जन गरेको अभियोगमा मुद्दा दायर गरेको छ ।

विभागले स्थापनाकालदेखि २०६८ सालसम्म शेयर मार्केट्स एण्ड फाइनान्स लिमिटेडमा कार्यकारी अध्यक्ष रहेका श्रेष्ठसहित अन्य ५ जना विरुद्ध मुद्दा दायर गरेको छ ।

विभागले योगेन्द्रकी पत्नी गीता, छोराहरु उत्सव, गौरव र सौरभ श्रेष्ठविरुद्ध समेत बैंकिङ कसुरबाट आर्जन सम्पत्ति शुद्धीकरण गरेको अभियोग लगाएको छ ।
मुद्दा दायर गर्दा श्रेष्ठसँग २ अर्ब ६६ करोड ६१ लाख विगो र त्यस्को दोब्बर जरिवानाको माग दावी पनि गरिएको छ ।

श्रेष्ठले नेपाल शेयर मार्केट्स एण्ड फाइनान्स लिमिटेडमा बचत भएको रकम हिसाब नदेखाई व्यक्तिको नाममा प्रयोग गरेको आरोपमा बैंकिङ कसुरको मुद्दासमेत खेपेका थिए ।

जसमा नागरिक लगानी कोषमा १६ करोड ५० लाख, माछापुच्छ्रे बैंकको ४ करोड ८८ लाख, जनता बैंकको १० करोड, हिमाल हाइड्रोको ९० लाख, नेपाली सेना कल्याणकारी कोषको ४ करोड, सन्ड्री डेप्स टर्सको ९ करोड ६९ लाख, बीमा संस्थानको २० करोड र विभिन्न व्यक्तिको बचत १७ करोड गरी कुल ८३ करोड ३ लाख रुपैयाँ अनियमित रुपमा दुरुपयोग गरेको आरोप थियो ।

उक्त रकम सम्बन्धित व्यक्ति वा संस्थाको खातामा नराखी दुरुपयोग गरेको आरोप थियो । उनीमाथि नक्कली ऋणी बनाई ३२ करोड ६४ लाख दुरुपयोग गरेको अभियोग पनि लगाइएको थियो ।

दोस्रो पटकको अभियोगमा श्रेष्ठविरुद्ध ३४ करोड ९३ लाख अपचलन गरेको मुद्दा चलेको थियो । तत्कालीन पुनरावेदन अदालतको वाणिज्य इजलासले दुई पटकको फैसलामा उनीसहितको टोलीले करिब १३ करोड रुपैयाँ अनियमितता गरेको ठहर गर्दै योगेन्द्रप्रसाद श्रेष्ठ र सिद्धार्थमान मास्केलाई ३ वर्ष कैद फैसला सुनाएको थियो ।

सोही प्रकरणमा श्रेष्ठमाथि छानबिन अघि बढाउँदा सम्पत्ति शुद्धीकरण अनुसन्धान विभागले गैरकानुनी रुपमा आर्जन गरेको ठूलो सम्पत्ति फेला पारेको हो । यसैबीच योगेन्द्र श्रेष्ठविरूद्ध ल्याएको अभियोगपत्र विशेष अदालतले अपुरो भएको भन्दै फर्काइदिएको छ।

मंगलबार विभागले श्रेष्ठविरूद्ध सम्पत्ति शुद्धीकरण गरेको अभियोग लगाउँदै मुद्दा दायर गर्न ल्याएको तर अभियोगपत्र अपुरो रहेको लगायतका कारण देखाएर फिर्ता पठाइएको विशेष अदालतले जनाएको छ ।

प्रतिक्रिया दिनुहोस्

LIVE TV