१७ जेष्ठ २०७७, शनिबार

काठमाडौं, १७ जेठ । नेकपा सचिवालय बैठकले अमेरिकी सहयाेग ‘एमसिसी परियोजना’ हाल संसदमा विचाराधीन रहेको र संसदबाट अनुमोदन नहुँदासम्म त्यसअन्तर्गतका कामहरू रोक्ने निर्णय गरेकाे छ ।

पार्टीभित्रै छलफल नगरी एमसीसी परियाेजना बजेटमा समावेश गरेकाे भन्दै नेकपा नेताहरूले असन्तुष्टि जनाएपछि शनिबार अाकस्मिक रूपमा सचिवालय बैठक बाेलाइएकाे थियाे । बैठकमा संसदले जे फैसला गर्छ, त्यहीअनुसार अगाडि बढ्ने निष्कर्ष निकालिएकाे प्रवक्ता नारायणकाजी श्रेष्ठले जानकारी दिए ।

‘एमसिसी अन्तर्गतका कामहरू जति अनुमोदन भएपछि गर्नुपर्ने काम छन् ती अनुमोदन भएपछि नै गर्ने समझदारी भयो,’ प्रवक्ता श्रेष्ठले भने, ‘संसदबाट एमसिसी अनुमोदन नहुँदासम्म त्यसअन्तर्गतका काम रोक्ने।’

उनले याे विषय अहिले संसदमा विचाराधीन रहेकाेले बजेटको व्यवस्था पनि त्यही अनुसार हुने कुरालाई स्पष्ट पारिने बताए । प्रधानमन्त्रीले संसदलाई जानकारी गराअनुसार नै एमसीसी सम्झौता यदि संसदबाट अनुमोदन भएमा त्यसैअनुसार हुने र नभए बजेटकाे व्यवस्था खारेज हुने उनकाे भनाइ थियाे । सदनबाट पारित हुन नसकेमा वैकल्पिक व्यवस्थाबारे सरकारले साेच्ने समेत उनले बताए ।

अर्थमन्त्रीले बिहीबार संसदमा प्रस्तुत गरेकाे बजेट वक्तव्यमा सम्भावित बैदेशिक अनुदान सहायता सम्बन्धी अनुसूचीमा एमसीसीको ५ अर्ब ७३ करोड रुपैयाँ सम्भावित स्रोतमा राखिएको छ ।

यसअघि एमसीसी सम्झौता बारे अध्ययन गर्न पार्टीले गठन गरेको कार्यदलले सम्झाैता संशाेधन नगरी यथास्थितिमा पारित गर्न नहुने प्रतिवेदन बुझाएकाे थियाे ।

प्रतिक्रिया दिनुहोस्
LIVE TV