२८ बैशाख २०७७, आईतवार

उदयपुर, २८ वैशाख । दुई सातायता भुल्के बस्तीको नतिजामा सुधार आउन थालेपछि स्थानीय प्रशासनले केही दिनभित्रै सिल गरिएको क्षेत्रलाई क्रमशः सहज गर्दै जाने रणनीति तय गरेको थियो। स्थानीय र प्रदेश सरकारको समन्वयमा गरिएको स्वाब परीक्षणका सबै रिपोर्ट नेगेटिभ आएपछि बस्ती पनि सामान्य बन्दै गएको थियो।

नेपाली सेना, सशस्त्र र नेपाल प्रहरीको घेरामा उकुसमुकुस जीवन बिताइरहेका सर्वसाधारण पछिल्लो नतिजामा खुसी हुँदै क्रमशः सहज हुनेमा आशा गरेका थिए। तर, उनीहरूको त्यो खुसीमा पुनः एक पटक ‘ब्रेक’ लागेको छ। शनिबार एकाबिहानै विभिन्न सञ्चारमाध्यममा पुनः तीन जना महिलामा कोरोना भाइरस देखापरेको समाचार सार्वजनिक भएपछि स्थानीय तहमा आएको त्यो खुसी हराएको हो।

दोस्रोपटक संकलन गरिएकामध्ये तीन जनामा संक्रमण देखिएपछि स्थानीय थप त्रसित भएका हुन्। तीन दिनअघि स्वास्थ्यकर्मीको टोलीले भुल्के क्षेत्रमा नै गई तीन सय ३४ जनाको स्वाब संकलन गरेको थियो। त्यसमध्ये धरानमा ९८ जना र विराटनगरमा २ सय ३८ जना परीक्षणका लागि पठाएकोमा ९० जनाको रिपोर्ट आउन बाँकी रहेको स्वास्थ्य कार्यालय प्रमुख मोहन सुवेदीले बताए। उनका अनुसार जिल्लामा हालसम्म एक हजार १३ जनाको स्वाब संकलन गरिएको छ। याे खबर अन्नपूर्ण पाेस्ट दैनिकमा छ ।

प्रतिक्रिया दिनुहोस्
LIVE TV