१८ माघ २०७६, शनिबार

हेटौंडा, १८ माघ । बाग्मती प्रदेशका मुख्यमन्त्री डोरमणि पौडेलले नयाँ वर्ष २०७७ मा सुरुङमार्ग निर्माण थालनी हुने बताउनुभएको छ ।

प्रदेशसभाको दोस्रो वार्षिकोत्सवका अवसरमा शनिबार आयोजित कार्यक्रममा उहाँले यस्तो प्रदेशका १३ वटै जिल्लाको आवश्यकता बनेको हेटौँडा-काठमांडौँ सुरुङमार्गको डिपीआरको काम फागुनभित्र सकिएर चैतमा निर्माणका लागि बोलपत्र आह्वान गरिने बताउनुभयो ।

File Picture

मुख्यमन्त्री पौडेलले काठमाडौंसँग जोडिने हेटौंडाका सबै मार्गहरु छ महिनाभित्र स्तरोन्नती र आरामदायी हुने जानकारी दिनुभयो ।

उहाँले हेटौँडाबाट काठमाडौँ जाने छोटो बाटोमध्येको भैँसे-भिमफेदी सडकखण्डको केही दिनमा नै बोलपत्र आह्वान गरिने जानकारी गराउँदै भिमफेदी-कुलेखानी सडकखण्ड निर्माणका लागि भने निर्माण सामग्रीसमेत झरिसकेको बताउनुभयो ।

प्रदेश राजधानी जोडिने सबै सडक अब फराकिला र स्तरीय हुने उहाँले जानकारी गराउनुभयो ।

प्रदेश राजधानीको स्थायित्व टुङ्गो नलागकेका कारण भौतिक निर्माणमा ढिलाइ भएकाले अब तीव्रगतिमा भौतिक संरचना निर्माण हुने मुख्यमन्त्री पौडेलको भनाइ छ ।

उहाँले अब प्रदेशसभाको अर्को अधिवेशन नयाँ भवनमा हुने र प्रदेशसभा सदस्यहरुको आवासक्षेत्र निर्माणमा समेत प्रदेश सरकार जुटेको बताउनुभयो ।

LIVE TV