१६ माघ २०७६, बिहीबार

काठमाडौं, १६ माघ । राष्ट्रिय जनता पार्टी (राजपा) नेपालका अध्यक्ष मण्डलका संयोजक तथा सांसद महेन्द्र राय यादवले आफ्नो पार्टी केन्द्रीय सरकारमा जानेबारे कुनै छलफल नभएको स्पष्ट पार्नुभएको छ ।

उहाँले भन्नुभयो, ‘सरकारमा सहभागी हुनेबारे हाम्रो पार्टीमा कुनै छलफल भएको छैन् । त्यसैले सरकारमा जाने सम्भावना छैन् । सरकारमा जानेबारे हामीसँग नैतिक धरातल छैन् ।

असोज ३ गतेलाई हामी कालो दिवसको रुपमा मनाउँछौं । अर्को कुरा प्रधानमन्त्री केपी शर्मा ओलीसँग पनि सरकारमा जाने विषयमा कुनै छलफल भएको छैन् ।’

विहीबार काठमाडौंमा आयोजित एक साक्षात्कारमा बोल्दै संयोजक यादवले सरकारमा सहभागी हुने कुरा आफूहरुको प्राथमिकता नभएको जिकिर गर्नुभयो ।

उहाँले भन्नुभयो, ‘राष्ट्रिय जनता पार्टी नेपाल सरकारमा जानको लागि ईच्छुक छैन् । तर, हाम्रा माग र मुद्दा सम्बोधन गरियो र एउटा वातावरण सहज बन्यो भने र हाम्रा सबै काम सम्पन्न भए भने हामी त्यतिवेला विचार गर्न सक्छौं । हाम्रा विगतका मुद्दा र मागलाई यो सरकारले सम्बोधन गरोस् । तर, अहिले सरकारमा जाने स्थिति छैन् ।’

आयोजित उक्त साक्षात्कारमा बोल्दै उहाँले आफ्नो पार्टीले प्रतिनिधिसभाको लागि उपसभामुख नमागेको स्पष्ट पार्नुभयो ।

उहाँले भन्नुभयो, ‘हामीले उपसभामुख हाम्रो पार्टीलाई देउ भनेर मागेका छैनौं । यो सरकारले हामीलाई उपसभामुख किन दिन चाहेको छ ? हामीले बुझ्न सकेका छैनौं ।’

सदन र सडक आफूहरुको नीति भएको सुनाउँदै उहाँले भन्नुभयो, ‘मधेशमा भएका शहीदहरुका सपना साकार पार्नको लागि र माग पूरा गराउनको लागि हामीले कुनै पद, सरकार र उपसभामुख हाम्रो माग होइन् । हामी सहिदको रगतमा कुनै सौदाबाजी गर्ने पक्षमा छैनौं ।’

वर्तमान सरकारले संविधान संशोधन गर्छ भन्ने कुरामा आफूहरु अझैपनि विश्वस्त रहेको संयोजक यादवको भनाइ छ ।

‘संविधान संशोधन गर्छ भनेर नै हामीले यो सरकारलाई यसभन्दा अघि एक वर्षसम्म समर्थन गरेका थियौं । तर, एक वर्षसम्म पनि संशोधन नभएकोले हामीले समर्थन फिर्ता लियौं । हाम्रो अहिलेपनि माग र मुद्दा यथावत छन् । ती माग र मुद्दा सम्बोधन नभएसम्म हामी सरकारलाई समर्थन गर्दैनौं । तर, हाम्रा माग पूरा भए समर्थन गर्नेबारे विचार गर्छौं ।’

मधेश आन्दोलनका घाइतेहरुको अझैपनि उपचार हुन नसकेको र मुद्दा लागेका कार्यकर्ताहरु फरार रहेको सुनाउँदै उनीहरुको माग पूरा गर्नुपर्ने उनले सुझाउनुभयो ।

उहाँले भन्नुभयो, ‘रेशम चौधरीको मुद्दा राजनीतिक मुद्दा हो । यो मुद्दालाई राजनीतिक रुपमा हल गरिनुपर्छ । हाम्रो पार्टीको विगतको मुद्दा अहिलेसम्मपनि यथावत छ । विगतमा हामीले जुन मुद्दा र मागको लागि यो सरकारलाई समर्थन गरेका थियौं, यो सरकारले त्यहीँबाट प्रक्रिया अगाडि बढाओस् ।

हामी यो सरकारलाई आवश्यकत्ता ठानेको खण्डमा हाम्रो माग र मुद्दालाई सम्बोधन गरेको अवस्थामा समर्थन दिन तयार छौं ।’

यादवले राजपा नेपाल र समाजवादी पार्टीबीच एकताको प्रक्रिया अघि बढिरहेकोले एकता हुने विश्वास दिलाउनुभयो ।

उहाँले भन्नुभयो, ‘एकताको लागि हामीले वार्ता कमिटी बनायौं, त्यो कमिटीले काम गरिरहेको छ । अहिलेपनि अनौपचारिक वार्ताहरु भैरहेका छन् ।’

उनले एकताको लागि धेरै कुरा मिलिसकेको जिकिर गर्नुभयो । उहाँले भन्नुभयो, ‘विचार, सिद्धान्त र मूल्यको आधारमा पार्टीको नाम, चुनाव चिन्ह र झण्डामा सहमति भैसकेको छ । तर, नेतृत्व व्यवस्थापनमा अहिले छलफल चलिरहेको छ ।’

उहाँले दुवै पार्टीको बराबर संख्या भएकोले सम्मानजनक नेतृत्व मिलाउने तयारी भएको पनि स्पष्ट पार्नुभयो । उहाँले दुई पार्टीबीचको एकता राष्ट्रिय आवश्यकत्ता भएको औंल्याउनुभयो ।

उहाँले भन्नुभयो, ‘हामी दुई पार्टीबीचको एकता राष्ट्रको एकता हुनेछ । र नेपाली जनताको एकता हुनेछ । हिजो मधेशका पार्टीहरुले उठाएका मुद्दाहरु सबै राष्ट्रिय भए, मधेश आन्दोलनका उपलब्धिलाई रक्षा गर्दै र विभिन्न चरणमा हिजोका सरकारसँग गरेका सम्झौता कार्यान्वयन गराउनको लागि पनि देशलाई तेस्रा वैकल्पिक शक्तिको आवश्यकत्ता छ ।’

उहाँले आफूहरुले चाँडोभन्दा चाँडो एकता प्रक्रिया टुँगोमा पुगोस भन्ने चाहेको पनि सुनाउनुभयो । तर, नेपाल कम्युनिष्ट पार्टी (नेकपा) र नेपाली कांग्रेसले आफूहरुको एकता नचाहेको उहाँको आरोप छ ।

उहाँले भन्नुभयो, ‘यी दुवै पार्टीले थ्रेस होल्ड लगाएपछि मधेशवादी पार्टी समाप्त हुन्छ भनेर सोचेका थिए, तर पहिचानको मुद्दा बचाउनको लागि हाम्रो बीचमा एकता आवश्यक छ ।’

यादवले प्रदेश नम्बर २ को राजपा नेपाल–समाजवादी पार्टीबीचको सरकारको वर्तमान गठबन्धन नटुट्ने पनि दाबी गर्नुभयो ।

उहाँले भन्नुभयो, ‘२ नम्बर प्रदेशको सरकार भनेको मधेशी, उत्पीडन, विभेदमा परेका समूदायको जनताको सरकार हो । यो सरकार ५ वर्षसम्म रहन्छ । कुनै तलमाथि हुँदैन् । अहिले जसको नेतृत्वमा छ, त्यही नै रहन्छ । तर हामी यसलाई सुदृढ गर्न खोज्छौं । विकास निर्माणको प्रक्रियालाई अघि बढाउने काम गर्छौं ।’

उहाँले २ नम्बर प्रदेशको सरकारलाई गिराउने भनेर बाहिर हल्ला र चर्चा चलेपनि त्यसमा कुनै सत्यता नभएको भन्दै कुनै सरकार ढल्नेबारे कुनै खतरा नरहेको जिकिर गर्नुभयो ।

डिम्पल कुमारी झाले राज्यमन्त्रीबाट दिएको राजीनामालाई पनि उहाँले आन्तरिक मामिलाको संज्ञा दिनुभयो ।

LIVE TV