१० माघ २०७६, शुक्रबार

काठमाडौं, १० माघ । नेपालको मौलिक संस्कृतिलाई विश्वसामू चिनाउने उद्देश्यले डिलबहादुर मगर (डिकेश) लगायत १२ जना नेपाली युवायुवतीद्वारा लगातार २७ घण्टा सामूहिक मौलिक लोक नृत्य प्रस्तुत गरेर ‘गिनिज बुक अफ वल्र्ड रेकर्ड’मा नाम लेखाउने घोषणा गरिएको छ ।

आगामी फागुन २२ गते काठमाडौंमा विहान ९ बजेदेखि उक्त कार्यक्रमको आयोजना गरिने भएको छ ।

शुक्रबार मारुनी मिडिया नेटवर्कले काठमाडौंमा पत्रकार सम्मेलन गर्दै उक्त विश्व कीर्तिमानीबारे जानकारी गराएको हो । उक्त किर्तीमान राख्नको लागि गिनिज बुकले अनुमतिसमेत दिइसकेको छ ।

कार्यक्रममा उक्त कीर्तिमान राख्नको लागि व्यवस्थापनको जिम्मेवारी लिएको गिनिज ईभेन्ट्स नेपालका अध्यक्ष सन्तोष लामाले कार्यक्रम सफलताको शुभकामना दिनुभयो ।

लामाले अगाडि भन्नुभयो, ‘कार्यक्रमको राम्रो तयारी भएको छ । यो नेपालको परिवेशमा पनि विशुद्ध नयाँ रेकर्ड हाँसिल हुने हामीले अपेक्षा लिएका छौं । व्यवस्थापकीय हिसाबले पनि धेरै राम्रो तयारी भएको छ ।’

पत्रकार सम्मेलनमा चर्चित लोकदोहोरी गायिका राधिका हमालले पनि विश्व कीर्तिमान कायम गर्नको लागि सामूहिक नृत्यमा सहभागीहरुलाई शुभकामना दिनुभयो ।

कार्यक्रममा मारुनी मिडिया नेटवर्कका प्रवन्धक डिल बहादुर मगर (डिकेश) ले ‘देशले हामीलाई के दियो ? भन्दापनि हामीले देशलाई के दियौं ?’ भन्ने मूल नाराका साथ आफूहरु विश्व कीर्तिमान राख्ने तयारीमा जुटेको स्पष्ट पार्नुभयो ।

मगरका अनुसार सो विश्व कीर्तिमान कार्यक्रममा नेपालको मौलिक गीत–संगीत, भेषभुषामा नृत्य प्रस्तुत गरिनेछ । समारोहको उद्घाटन भने देशका विशिष्ट व्यक्तिहरुले गर्ने कार्यक्रम तय भएको छ ।

यसअघि सन् २०११ अक्टोबर ३१ मा अमेरिकाको एम.टि.भि.ओ. म्युजिक अवार्डको नाममा १३ जना युवायुवतीले लगातार २४ घण्टा १ मिनेट सामूहिक नृत्य गरेर विश्वकै सबैभन्दा लामो सामूहिक नृत्यको विश्व रेकर्ड राखेका थिए ।

अमेरिकाको नाममा रहेको यसअघिको रेकर्ड तोड्न र नयाँ रेकर्ड राख्ने प्रयासस्वरुप मारुनी मिडिया नेटवर्कमार्फत १३ जना नेपाली युवा युवतीद्वारा सामूहिक नृत्य गर्ने घोषणा गरिएको हो ।

सामूहिक नृत्यमा सामेल हुनेहरुमा डिलबहादुर मगर (डिकेश), केशबहादुर पुर्जा, शात्ना तिलिजा, सरला तिलिजा, शिक्षा गर्बुजा, अंशु गर्बुजा, चन्द्रमाया गुरुङ, जस्टिना श्रीस, सुस्मिता गुरुङ, शान्ति शाही, यमुना रोका, सञ्जु पुन र राजिन पुन रहेका छन् ।

LIVE TV