१ माघ २०७६, बुधबार

राजविराज, १ माघ । सप्तरीमा शिशु हत्या गरेको आरोपमा एक महिलालाई पक्राउ गरी कारवाही प्रक्रिया अगाडि बढाइएको छ ।

सप्तरीको रुपनी गाउँपालिका–३ मा नवजात शिशु जन्माई मारी फालेको घटनाको आरोपमा २५ वर्षीया ती महिलालाई पन नियन्त्रणमा लिएकाे प्रहरी नायब उपरीक्षक तिलक भारतीले जानकारी दिनुभयो ।

महिलाको नाम भने प्रहरीले खुलाएको छैन । शिशुकाे ज्यान लिएको झण्डै एक महिनापछि प्रहरी अनुसन्धानबाट आमा नै दोषी देखिएपछि प्रहरीले उनलाई नियन्त्रणमा लिइ कर्तव्य ज्यान मुद्दाको उजूरी दर्ता गरी थप अनुसन्धान थालिएको उहाँले बताउनुभयो ।

रूपनी गाउँपालिका–३ हर्दियास्थित तिलेश्वर साहको पोखरीमा मङ्सिर २८ गते माछा मार्न स्थानीयवासीले हालेको जालमा बालिका शिशुको शव फेला परेको थियो । अवैध गर्भबाट छोरी जन्मिएका कारण शिशुकाे ज्यान लिएको हुनसक्ने प्रहरीले अनुमान गरेको छ ।

दुई छोराकी आमासमेत रहेकी ती महिलाको श्रीमान् वैदेशिक रोजगारका लागि मलेशियामा रहेको जनाइएको छ ।

LIVE TV