२९ श्रावण २०७६, बुधबार

एजेन्सी । पोर्चुगिज क्लब च्याम्पियन्स लिग फुटबलको छनौट चरणबाटै बाहिरिएको छ । छनौटको तेस्रो चरणको दोस्रो लेगमा मंगलबार राति रुसी क्लब एफके क्रास्नोडारसँग पराजित भएपछि पोर्टो बाहिरिएको हो ।

घरेलु मैदानमा भएको दोस्रो लेगमा पोर्टो ३–२ ले पराजित भएपछि समग्रमा ३–३ को बराबरी भयो । तर अवे गोलका आधारमा पोर्टो पराजित भयो । अवे मैदानमा भएको पहिलो लेगमा पोर्टो १–० ले विजयी भएको थियो ।

मंगलबार राति भएको दोस्रो लेगमा भ्रमण टोली एफके क्रास्नोडारले पहिलो हाफमै तीन गोल गरेको हो । उसका लागि भिल्हेनाले गोल गरे भने १२ र ३४ औँ मिनेटमा सुलेयमानोभले गोल गरेका हुन् । पोर्टोका लागि मेन्डेस एनड्राडी र लुइस डियाजले गोल गरे ।

पोर्टो बाहिरिए पनि गएको सिजनको सेमिफाइनलिस्ट डच क्लब अजाक्सले अन्तिम चरणको प्ले–अफमा स्थान बनाएको छ । अजाक्सले पाओक सालोनिकालाई मंगलबार राति भएको दोस्रो लेगमा ३–२ ले पराजित गर्दै समग्रमा ५–४ को जित निकालेर अन्तिम चरणको प्ले–अफमा स्थान पक्का गरेको हो ।

यसैगरी दोस्रो लेगमा ३–३ को बराबरीसहित डिनामो किएभमाथि समग्रमा ४–३ को जित निकालेर क्लब बर्गले पनि प्ले–अफमा स्थान बनाएको छ ।

प्रतिक्रिया दिनुहोस्
LIVE TV