१८ श्रावण २०७६, शनिबार

१. अस्पतालहरु आफैले अक्सिजन प्लान्ट राख्न थालेपछि विरामीलाई राहत, अस्पताललाई पनि फाइदा
नेपाल आयात गरिने वस्तुहरु मध्ये अक्सिजन पनि प्रमुख हो । र , यसैमा ठूलो धनराशी नेपालबाट बाहिरिदै आएको छ । त्यसमाथि अस्पतालहरुका लागि अति आवश्यक अक्सिजनको खपतमा ठूलो मूल्य चुकाउनु पर्ने अवस्था छ । तर अब नेपालमा पनि अस्पतालहरु आफैले अक्सिजन प्लान्टहरु राख्न थालेपछि अस्पताल र विरामी दुबैलाई फाइदा पुग्न थालेको छ भने यस्ले बाहिरिने ठूलो रकमलाई पनि रोकेको छ ।

अस्पताल आफैले उत्पादन गरेको अक्सिजन सस्तो पनि हुन पुग्दा विरामीको परिवारमाथि आइपर्ने आर्थिक बोझ कम हुँदै गर्दा अस्पतालले आफ्नो खर्चको ठूलो हिस्सा कटौती गर्न सफल भएको छ ।

२. झापा र इलामको चुरे क्षेत्रमा गरिएको केरा खेती देशभरका चुरे क्षेत्रका लागि अनुकरणीय
खेर गएको र नचिनेको नजानेको अवस्थामा नेपालमा धेरै जमिनहरु बाँझो नै छ । आफ्नो खेतबारी , खलिहान र जमिन बाँझो राखेर आत्मनिर्भरताको पूmर्ति देखाउने हामी पसिना बगाएको भन्दा पसिना बगाएर कमाएको रकम खर्चनमा नै रमाउने गर्छौ । तर अब चेत फुर्न थालेको हो कि मेहनत गर्ने जाँगर चल्न थालेको हो , केही सकारात्मक पाटोहरु देखिन थालेका छन् । चुरे क्षेत्र नेपालको अथाह श्रोत भएको क्षेत्र मात्र नभइ तराई मधेसलाई जहिले पनि हरियाली राख्ने हैसियत भएको क्षेत्र पनि हो ।

यही चुरे क्षेत्रको विनाशले मुलुकले नसोचेको ताण्डव र अकल्पनीय समस्याहरु देखिन थाल्दा चुरे क्षेत्रको संरक्षणकै लागि बिभिन्न गतिविधि हुँदै गर्दा झापा र इलामको चुरे क्षेत्रमा भने केरा खेती सुरु गरेर उदाहरणीय कार्य गरिन थालिएको छ । चुरे क्षेत्रमा गरिएको केरा खेतीले बजार पनि राम्रो पाउने थालेपछि यो लहर पूर्वको झापा र इलाम मात्र नभई पश्चिमको कैलाली कञ्चनपुरको चुरे क्षेत्रसम्म नै फैलिन आवश्यक छ ।

३.संसद विकास कोषको रकम दुरुपयोग कसरी हुन्छ भन्ने प्रमाण सुनसरी हरिनगरको सडकले देखायो
देशको पैसा सहजै बगाउने ठाउँ बाटो पनि हो , जनताले तिरको कर फिजुलमा नै रित्याउने ठाउँ सडक पनि हो । वर्खा लागेपछि बाटो बनाउने , झमझम पानी पर्न थालेपछि पिच अर्थात कालोपत्रे गर्ने , असार लागेपछि बजेट रित्याउन रातोरात विकास निर्माणको काम गर्ने बानी परेको यो मुलुकमा सुधार्न नसकेको यो पक्ष अझै बेलगाम बनेर अघि बढ्ने अवस्था देखिएको छ ।

सांसद विकास कोष नामक सांसदहरुको व्यक्तिगत भण्डार अहिले झनै नमुना बनेर देखिन थालेको छ । आफ्नो गोजीका कार्यकर्ताको गोजी भर्न सांसद विकास कोषको कुन हदसम्म दुरुपयोग हुन्छ भन्ने सुनसरीको हरिनगर गाउँपालिकाको सडक निर्माणमा देखिएको छ । तर काम नलाग्ने गरी विग्रिएको बाटो देखाएर उपभोक्ता समित भन्छ – कतै भ्रष्टाचार छैन, वाटो हामीले राम्रो बनाएका छौ ।

४. सबै सुविधाहरु खोसिन थालेपछि चहलपहलको कुनै कमी नहुने रमणीय शहर इलाम सुनसान बन्दै
अहिले बसेको बजार होइन इलाम , उहिले नै स्थापित शहर हो । राणाकालदेखि नै शक्ति र चर्चाको केन्द्र बनेको चियाको जननी शहर इलामले धेरै कालखण्डमा ऐतिहासिक भूमिका पनि निभाएको छ मुलुकका लागि । ‘गयो इलाम खायो सिलाम हिड्ने बेलामा गुण्टा लिलाम’ भन्ने कहावत जोडिने गरेको इलामसंग अब भने सबैथोक गुम्दै गएको छ ।

इलाम सदरमुकाम कुनै समय विद्यार्थी ,कर्मचारी, पर्यटक,सर्वसाधारण र व्यवसायीको चापले खुट्टा हाल्ने अवस्था हुदैनथ्यो । तर अहिले इलाम सुनसान बन्न थालेको छ , इलामसंग जोडिएको धेरै सुख सुविधा खोसिन थालेपछि मन पराउनेहरुले पनि बाध्य भएर इलामलाई माया मार्न थालेका छन् ।

प्रतिक्रिया दिनुहोस्
LIVE TV