१७ श्रावण २०७६, शुक्रबार

काठमाडाैं । मुलुकभर जबर्जस्ती करणीका घटना बढेका छन् । प्रहरी प्रधान कार्यालयले दिएको जानकारीअनुसार आर्थिक वर्ष २०७४/७५ को तुलनामा आव २०७५/७६ मा जबर्जस्ती करणीका मुद्दामा वृद्धि भएको हो ।

प्रहरी प्रधान कार्यालय अनुसार दैनिक पाँच जना भन्दा बढीले जबर्जस्ती करणीका मुद्दा दर्ता गर्छन् । आ.व. २०७५/७६ मा एक हजार ८७३ मुद्दा दर्ता भएका छन् । आ.व. २०७४/७५ मा एक हजार ४८० मुद्दा दर्ता भएका थिए । त्यस्तै आ.व. २०७३/७४ मा भने एक हजार १३७ मुद्दा दर्ता भएका थिए ।

केन्द्रीय प्रहरी प्रवक्ता एवं प्रहरी नायब महानिरीक्षक विश्वराज पोखरेल जबर्जस्ती करणीका घटना हिजोका दिनमा लुकाउने गरे पनि पछिल्लो समय प्रहरीलाई सूचना दिने प्रवृत्तिका कारण यस्ता घटनामा वृद्धि आएको बताउनुहुन्छ ।

कुनै पनि महिलाको इच्छाबेगर जबर्जस्तीरूपमा यौन सम्पर्क गर्न खोज्नुलाई जबर्जस्ती करणी भनिन्छ । प्रहरी प्रवक्ता पोखरेल आफूले चिनेका व्यक्ति, आफ्नो नाता सम्बन्ध र छरछिमेकका व्यक्तिबाट धेरै जबर्जस्ती करणीका घटना हुने गरेको बताउनुहुन्छ ।

“हिजो विश्वास गरेका व्यक्ति, नाता र छरछिमेक आज अविश्वासमा परिणत भएको छ”, उहाँ भन्नुहुन्छ । सामाजिक सञ्जाल र प्रविधिको प्रयोगबाट यस्ता घटना बढेकोे उहाँको भनाइ छ ।

प्रतिक्रिया दिनुहोस्
LIVE TV