२७ चैत्र २०७५, बुधबार
  • सुरेश श्रेष्ठ,

तुलसीपुर, २७ चैत । तुलसीपुर उपमहानगरपालिकाको चौथो नगर सभा बुधवार सकिएको छ । नगर सभाको वैठकले संशोधनसहित ६ वटा विधेयक पारित गरेको छ । नगर सभामा विधायन समितिका संयोजक देवराज विश्वकर्माले प्रस्तुत गरेको तुलसीपुर विकास वोर्ड गठन सम्वन्धि विधेयक, कृषि व्यवसाय प्रवद्र्धन विधेयक, शिक्षा विधेयक, नवराज लामिछानेले प्रस्तुत गरेको विपद जोखिम न्यूनिकरण तथा व्यवस्थापन विधेयक, वाल संरक्षण तथा संवद्र्धन नीति र राजु आचार्यले प्रस्तुत गरेको नगर स्वास्थ्य विधेयक संशोधनसहित पारित गरेको छ । नगर प्रमुख घनश्याम पाण्डेको अध्यक्षतामा बसेको बैठकले वार्षिक योजना तथा संशोधन प्रस्ताव पनि बहुमतले पारित गरेको हो ।

सभाले तुलसीपुर विकास बोर्ड गठनको विधेयक पारित गरेसँगै ऐन वनाएर अगाडि बढ्ने छ । विधेयकमा उल्लेख भए बमोजिम यसभन्दा अगाडि सञ्चालनमा रहेका उपमहानगरपालिका र तत्कालीन गाविसमा रहेका विभिन्न कोषहरुलाई एकीकृत गरेर परिचालन गर्नका लागि बोर्डमा व्यवस्था गरिएको छ । विधेयकमा विभिन्न दातृ निकायले सहुलियत दरमा उपलब्ध गराएको ऋण सहयोग उपमहानगरपालिकाका निम्न वर्गका जनताको आर्थिक विकास, सामाजिक विकास, उद्यशिलता र रोजगारी विकासका लागि परिचालन गरिने व्यवस्था पनि गरिएको छ ।

त्यसैगरी तुलसीपुर उपमहानगरपालिकाको शिक्षा विधेयक पनि संशोधनसहित पारित गरिएको छ । शिक्षा विधेयक पारित भएसँगै शिक्षासँग सम्वन्धित विभिन्न अन्यौलहरु हटेर जाने विश्वास लिएको शिक्षा समितिका संयोजक देवराज विकले बताए । नगर सभाले पारित गरेको नगर विपद् जोखिम न्युनीकरण तथा व्यवस्थापन ऐनमा उल्लेख भए अनुसार विपद व्यवस्थापनका लागि उपमहानगरपालिकाले छुट्टै आकस्मिक कोषको व्यवस्था गर्ने भएको छ ।

उपमहानगरपालिकाले वार्षिक वजेटबाट स्विकृत रकमका साथै प्रदेश र संघका साथै विभिन्न दान दातव्यबाट प्राप्त रकम समेत कोषमा राखेर विपद व्यवस्थापनको काम गर्नेछ । यसका साथै कुनै ठाउँमा गम्भीर प्रकृतिको विपद् उत्पन्न भएमा संकटग्रस्त क्षेत्रका रुपमा समेत घोषणा गर्ने प्रावधान विधेयकका राखिएको छ ।

नगरसभाले तुलसीपुर उपमहानगरपालिकाको बाल संरक्षण नीति र नगर स्वास्थ्य विधेयक समेत पारित गरेको छ । नगर सभामा नगरसभा सदस्य सुरेश श्रेष्ठ, सुभाष डि.सि. मदन बस्नेत, घनश्याम गौतम र युवा करारा लगायतले विभिन्न विधेयकमा संशोधन प्रस्ताव राखेका थिए ।

LIVE TV