१४ चैत्र २०७५, बिहीबार

काठमाडौ १४ चैत । प्रधानमन्त्री के.पी. ओलीले नेत्रविक्रम चन्द नेतृत्वको नेकपालाई समर्थन गरेको भन्दै पोख्नु भएको आक्रोशलाई नेपाली काँग्रेसले दुःखद र हल्का अभिव्यक्ति भएको प्रतिक्रिया दिएको छ ।

काँग्रेस प्रवक्ता विश्वप्रकाश शर्माले एक विज्ञप्ती जारी गर्दै नेपाली काँग्रेस प्रति गरेको टिप्पणी प्रधानमन्त्रीको पदीय गरिमाको उचाई अनुरुप समेत नभएको आरोप लगाउनु भएको छ ।

विज्ञप्तीमा भनिएको छ ‘एकदलीय अधिनायकवादको कम्युनिष्ट दर्शन बोकेर र घोकेर जीवनको पूर्वाद्ध विताएका जो कोहीलाई जीवनको उत्तरार्धमा लोकतान्त्रिक पद्धतिको बाटो हिड्नु पर्ने परिस्थिति निश्चयनै कठिन रहेको मनस्थिति हामी बुझ्न सक्छौं । तर कांग्रेसले स्थापनाकालदेखि अंगिकार र विश्वास गरेको मार्गमा समाहित भएर अन्ततः कांग्रेसलाई नै लोकतन्त्रको व्याख्या सुनाउने कर्म ‘आमाका अघि मावलको बयान’ भन्दा भिन्न छैन ।’

विप्लव समूहलाई लगाइएको प्रतिबन्ध बारे काँग्रेसको स्पष्ट धारणा रहेको उल्लेख गर्दै विज्ञप्तीमा भनिएको छ ‘नागरिक जीवनलाई सुरक्षा प्रदान गर्नु राज्यको दायित्व हो तर निषेधले समाधानमा पुग्न सकिन्न । वार्ताबाट अन्तिम समाधानमा पुग्ने शासकीय योग्यता प्रधानमन्त्रीसँग हामी खोजिरहेका छौं र हत्या, हिंसा एवं चन्दा आतङ्क त्यागेर शान्तिपूर्ण प्रक्रियामा आउन विप्लव समूहलाई अपिल गरिरहेका छौं । विद्रोहीको हिंसा, राज्यको प्रतिबन्ध र प्रधानमन्त्रीका तिक्त अभिव्यक्तिहरुको आतङ्कले मुलुकलाई समाधान दिंदैन ।’

बिखण्डनको मुद्दा परित्याग गरेर नेपालको अखण्डता स्वीकार्ने जो कसैलाई नेपाली काँग्रेसले स्वागत गर्ने बताउदै सरकार र सीके राउतबीचको सम्झौताको दोस्रो वुँदामा उल्लेखित ‘जनअभिमतमा आधारित लोकतान्त्रिक विधि’ को साझा व्याख्या सम्झौताको तीन साता पुग्दा पनि आउन नसक्नु दुःखद र आपत्तिजनक भएको पनि विज्ञप्तीमा उल्लेख छ । तिक्त भाषणहरुमा समय खेर फाल्नु भन्दा परिपक्व छलफलमा समय लगाउनु पर्ने प्रधानमन्त्रीको कर्तव्य भएको स्मरण पनि काँग्रेसले गराएको छ ।

नेपाली कांग्रेसले आफ्नो नेतृत्वमा निर्माण भएको संविधानप्रति स्वामित्व बोध सदैव गरेको र आवश्यक संशोधन मार्फत यसप्रति अपनत्वको दायरा विस्तार गर्न सकिने विषयप्रति विश्वस्त रहेको पनि विज्ञप्तीमा उल्लेख गरिएको छ । कांग्रेसको कर्म र विश्वासप्रति औचित्यहिन टिप्पणीहरु गरेर दिन बिताउनु भन्दा जनताले सुम्पिएको दायित्व बमोजिम जिम्मेवार ढंगले कार्य गर्न पनि प्रधानमन्त्री ओलीलाई काँग्रेसले सचेत गराएको छ ।

LIVE TV