वीरेन्द्रनगरमा ‘महिला तथा पुरुष मुख्यमन्त्री कप भलिबल प्रतियोगिता’ सुरु



प्रकाशित मिति : Feb 13, 2019
  • राजु कोइराला,

सुर्खेत, १ फागुन । कर्णालीमा सर्बाधिक राशीको मुख्यमन्त्रीकप रनिङ्गशिल्ड सुरु भएको छ । प्रदेश सरकारको आयोजनामा बुधबारदेखि सुर्खेतको वीरेन्द्रनगरमा महिला तथा पुरुष मुख्यमन्त्रीकप भलिबल प्रतियोगिता सुरु भएको हो ।

एकलाख माथि पुरस्कार राशी राखिएको कर्णाली प्रदेशमा भलिबल खेलको यो पहिलो प्रतियोगिता हो । सामाजिक विकास मन्त्रालयअन्तर्गत खेलकुद प्रतियोगिताका लागि विनियोजित बजेटबाट यसपटक नेपालको राष्ट्रिय खेल भलिबलको विकासका लागि मुख्ममन्त्री रनिङ्गशिल्ड नाममा प्रतियोगिता आयोजना गरिएको आयोजक मुख्यमन्त्री कार्यालयले जानकारी दिएको छ ।

मन्त्रालयका अनुसार आगामी शनिबारसम्म प्रतियोगिता संचालन हुने भएको छ ।प्रतियोगिताको उद्घाटनमा कर्णाली प्रदेशका मुख्यमन्त्री महेन्द्रबहादुर शाहीले विकास र शिक्षाका हिसावले निकै पछाडि मानिएको कर्णालीलाई खेलकुदको क्षेत्रका रुपमा परिचित गराउने प्रतिबद्धता जनाए ।

‘हाम्रो कर्णालीमा पनि राष्ट्रिय र अन्तर्राष्ट्रिय स्तरमा क्षमता देखाउन सक्ने खेलाडी छन्, गाउँमा लुकेर रहेका प्रतिभालाई व्यवसायिक खेलप्रति उत्साहित गराउन नै यो प्रतियोगिता आयोजना गरिएको हो’ उनले भने, ‘सुर्खेतमा मात्रै होइन, अब अन्तर्राष्ट्रिय स्तरमा समेत कर्णालीका खेलाडिको आवश्यकता यस प्रतियोगिताले दर्शाउनेछ ।’ प्रदेश सरकार खेलकुदको विकासका लागि जिम्मेवार भएको बताउँदै उनले आगामी दिनमा पनि यस्ता प्रतियोगितालाई निरन्तरता दिने प्रतिबद्धता गरे ।

प्रतियोगिताको पहिलो दिन नै जुम्लाले अग्रता लिएको छ । बुधबार भएको दोस्रो खेलमा पुरुष तर्फ विजयी भएको जुम्लाले महिला तर्फको खेलमा पनि विजय हासिल गरेको छ । डोल्पालाई हराउँदै पुरुष टिमले जित निकालेको थिया भने, महिलातर्फ जाजरकोटलाई हराउँदै आफ्नो जीत सुरुवात गरेको छ ।

यस्तै, बुधबार नै भएको पुरुषतर्फको खेलमा हुम्लालाई हराउँदै जाजरकोट विजयी भएको छ । महिला तर्फ दैलेख र मुगुबीचको खेलमा दैलेखले जित निकालेको छ भने, महिलातर्फ नै रुकुम पश्चिमलाई हराउँदै कालिकोटले विजयी सुरुवात निकालेको छ ।

१० जिल्ला रहेको कर्णालीका प्रत्येक जिल्लाबाट एक÷एक वटा महिला पुरुषका टिम सहभागी भएकोे प्रतियोगितामा प्रथम हुने टिमले शिल्ड सहित नगद एक÷एक लाख रुपैयाँ पुरस्कार प्राप्त गर्नेछन् । यस्तै दृतियलाई ७५÷७५ हजार नगदसहित प्रमाणपत्र र तृतिय हुने टिमलाई नगद ५०÷५० हजार प्रदान गरिने आयोजकले जनाएको छ ।

सामाजिक विकास मन्त्रालयका सचिव बिकका अनुसार खेल तयारीका लागि यसअघि नै प्रत्येक जिल्लामा एक÷एक लाख रुपैयाँ नगद सहयोग पठाइसकिएको थियो । प्रतियोगिता अवधिभर उत्कृष्ट हुने एक महिला र एक पुृरुष खेलाडीलाई नगद पाँच÷पाँच हजार पुरस्कार समेत उपलब्ध गराइने भएको छ ।


प्रतिक्रिया दिनुहोस्

Copyright © 2018 All rights reserved by NBC.
Designed by appharu.com