३ माघ २०७५, बिहीबार

काठमाडौँ । साउदी अरबसँग द्विपक्षीय श्रम सम्झौता गर्न जोड दिएको छ । श्रम, रोजगार तथा सामाजिक सुरक्षामन्त्री गोकर्ण विष्टले नेपालबाट ठूलो सङ्ख्यामा श्रमिक लिँदै आएको साउदी अरबसँग द्विपक्षीय श्रम सम्झौता हुनुपर्नेमा जोड दिएको हो।

मन्त्री विष्टसँग नेपालका लागि साउदी अरेबियाका राजदूत मुसेद एसएआइ मारवेनीले विहीबार गरेका शिष्टाचार भेटमा उनले साउदी अरबमा ठूलो सङ्ख्यामा रहेका नेपाली श्रमिक र घरेलु कामदारलाई व्यवस्थित गर्न दुई मुलुकबीच तत्काल द्विपक्षीय श्रम सम्झौता गरिनुपर्नेमा जोड दिनुएका थिए ।

सो क्रममा मन्त्री विष्टले घरेलु कामदारको सम्बन्धमा अलग्गै द्विपक्षीय श्रम सम्झौताको व्यवस्था गर्नुपर्ने बताएका थिए । उनले नेपाली श्रमिक साउदी अरब जाने विषयमा निश्चित विधि र शर्तको आधारमा अगाडि बढ्न र त्यस्ता विषयलाई समेत सम्झौतामा उल्लेख गर्नुपर्ने बताएका श्रम मन्त्रालयले जनाएको छ ।

नेपाली श्रमिकको शव नेपाल ल्याउन लामो समय लाग्ने, श्रमिकले करार सम्झौताबमोजिमको पारिश्रमिक तथा सेवा सुविधा पाउन कठिनाइ हुने, करार अवधि समाप्त भइसकेपछि समयमै स्वदेश फिर्ता हुन व्यवहारिक झञ्झट रहने जस्ता समस्या नेपाली श्रमिकले भोग्दै आइरहेको जानकारी गराउँदै मन्त्री विष्टले यस्ता क्रियाकलापमा साउदी सरकारको विशेष ध्यानाकर्षण गराए ।

भाषा र अन्य समस्याको कारणले सानो गल्ती गर्दा पनि नेपालीले जेल जीवन बिताउनु परेको उल्लेख गर्दै उनले यसको लागि दुवै मुलुक जिम्मेवार हुन जरुरी रहेको कुरा बताए । सो अवसरमा राजदूत मारवेनीले द्विपक्षीय श्रम सम्झौताको मस्यौदालाई अन्तिम रुप दिन साउदी सकारात्मक रहेको बताउनुभएको थियो ।

द्विपक्षीय श्रम सम्झौताको लागि साउदी सरकारले यसअघि नै सम्झौताको मस्यौदा पठाइसकेकाले दुवै मुलुकले प्राविधिक समूह गठन गरी छलफलको माध्यमबाट निश्कर्षमा पुग्नु पर्नेमा राजदूत मारवेनीले जोड दिनुभएको थियो ।

LIVE TV