तरुलको आयात पनि भारतबाटै, उपत्यकाभित्र एक सातामा करिब २० करोडको तरुल बिक्री

काठमाडौं । माघे संक्रान्तिमा विशेष रुपले तरुल खाने प्रचलन छ । माघे संक्रान्तिको दिन चाकु र घिउसँग खाइने तरुलको आयातसमेत भारतबाट गरिन्छ । उपत्यकामा मात्र एक सातामा झण्डै २० करोड रुपैयाँको तरुल बिक्री भएको छ।

नेपाल फलफूल तथा तरकारी व्यवसायी महासंघका अध्यक्ष खेमप्रसाद घिमिरेलेका अनुसार बिक्री भएको तरुलमध्ये करिब १० प्रतिशत |(करिब दुई करोड रुपैयाँको) (सिम्मल तराई जातको) तरुल भारतको उत्तर प्रदेशबाट आयात भएको हो ।

यो वर्षको ६ दिन (पुस २५ गतेदेखि ३० गतेसम्म) मा करिब दुई हजार पाँच सय टन विभिन्न प्रकारका तरुलको कारोबार भएको महासंघले जनाएको छ। ‘गत वर्षभन्दा ४० प्रतिशतले कारोबार बढ्यो,’ अध्यक्ष घिमिरेले भने, ‘अघिल्लो वर्ष सीमित बजारबाट १३ करोड मूल्यबराबरको तरुल बिक्री भएको थियो । अहिले आयात दर पनि विस्तारै घट्दो क्रममा छ,’ ‘स्वदेशमै ठूलो परिमाणमा उत्पादन हुन थालेकाले आयात दर पहिलेको भन्दा घटेको हो।’

उपत्यकाका लागि मुख्य कारोबार हुने स्थल कालिमाटी बजारमार्फत ६ दिनमा साढे १० करोड मूल्यको तरुल बिक्री भएको अध्यक्ष घिमिरेले बताएका छन् । गत वर्ष कालिमाटी बजारमा सात सय टनका हाराहारीमा तरुल कारोबार भएको थियो । बाँकी बल्खु बजारबाट पाँच सय ५०, बानेश्वर बजारबाट ८०, जडिबुटी बजारबाट ६०, बालाजु बजारबाट सय र टुकुचा बजारबाट ८० टनको हाराहारीमा तरुलको कारोबार भएको छ।

‘व्यवसायीले बाहिरबाट ल्याएको सबै तरुल सोमबार साँझसम्म बिक्री भएको छ,’ अध्यक्ष घिमिरेले भने,‘मंगलबार बिहान त एकादुई व्यवसायीसँग मात्र तरुल बाँकी हुन्छ।’ उनका अनुसार पछिल्लो ४–५ वर्षयता तरुलको व्यापार निकै फस्टाएको छ। पहिले खान नरुचाउने उपभोक्ता पनि स्वास्थ्यका लागि लाभदायक मानिने तरुलका परिकारमा पल्केका छन्।

उपत्यकामा हुने तरुलको कूल कारोबारमध्ये झण्डै ८० प्रतिशत सर्लाहीबाट भित्रिन्छ। बाँकी २० प्रतिशतमा भारत र स्वदेशकै अन्य जिल्लाको उत्पादनले हिस्सा ओगटेको छ।यो खबर आजको अन्नपूर्ण पोष्ट दैनिकमा छ ।