२७ पुष २०७५, शुक्रबार

कास्की । अब पोखरा महानगरपालिका वडा ‌न- ९ भित्र सडक तथा अन्य सार्वजनिक स्थलमा जथाभावी फाेहाेर फालेमा जरिवाना हुने भएकाे छ । वडा जनप्रतिनिधिको नेतृत्वमा गठन भएको सरसफाइ समितिका सदस्यले सडकमा फोहरमैला फाल्नेहरुको गतिविधि निगरानी गर्न साँझ-बिहान गस्ती गर्ने गरेका छन् ।

फोहरमैला सार्वजनिक स्थलमा फालेको भेटिएमा समितिले पहिलोपटक फोहरसहित फिर्ता पठाउने छ भने दोस्रोपटक पनि फेला परे जरिवाना गराउने छ । अनुगमन टोलीको आँखा छलेर फोहरमैला फाले भने पनि टोलीले कसको फोहरमैला हो भनेर पत्ता लगाएर जरिवाना गराएरै छाड्ने भएकाे छ । 

पोखराको मुख्य बजार महेन्द्रपुल, चिप्लेढुङ्गा र न्यूरोडको क्षेत्रपर्ने वडा नं ९ मा सरसफाइ अनुगमन समिति गठन भएर प्रत्येक रात र बिहान समिति गस्तीमा निस्कने गरेको छ । फोहरमैला महानगरको फोहर बोक्ने गाडीमा मात्र फाल्नुपर्ने र जथाभावी सडकमा ल्याएर फाल्नेक्रम बढेपछि वडाले अनुगमन समिति बनाएर दैनिक गस्ती गर्न थालेको हो । 

आफ्नो घरायसी, सङ्घसंस्था तथा कार्यालयलगायतको फोहरमैला रातको समयमा ल्याएर सडकमा फालेर सडक प्रदूषित भएपछि सडक सफा राख्न वडा कार्यालयले निर्माण गरेको अनुगमन समितिले नै निगरानी गर्न साँझ बिहान गस्तीमा निस्कने गरेको वडाध्यक्ष रामराज लामिछानेले बताए । 

गत साउनदेखि अनुगमन टोलीले गस्ती गर्न थालेपछि सडकमा फोहर फाल्ने प्रबृत्तिमा विगतमा भन्दा ९० प्रतिशत कमी आएको उनकाे भनाइ छ । अनुगमन टोली हरेक दिन बिहान ४ः३० देखि ८ बजेसम्म र साँझ ७ः३० देखि ११ बजेसम्म सडकमै अनुगमनमा खटिने गरेको लामिछाने बताउँछन् । 

सार्वजनिकस्थलमा फोहर फाल्दै गर्दा अनुगमन समितिले पुस १५ गतेसम्म ३८ जनालाई जरिवाना तिराएको छ । त्यस्तै जरिवाना तिर्न अटेर गर्ने १२ जनालाई कारवाहीका लागि महानगरपालिकामा सिफारिश गरिएको छ भने ६० जनालाई पहिलो पटकका लागि भनेर फोहरसँगै फिर्ता पठाइएको वडासचिव लोकदर्शन कोइरालाले जानकारी दिए । 

हालसम्म वडाले जरिवानाबापत रु ८५ हजार ५०० सङ्कलन गरेर महानगरमा दाखिला गरिसकेको र फोहरको परिणाम र प्रकृति हेरिकन रु १०० देखि छ हजारसम्म जरिवाना तोकिएको कोइरालाले बताए । 

प्रतिक्रिया दिनुहोस्
LIVE TV