१४ पुष २०७५, शनिबार

बेनी । यहाँकी एक महिला पशुपालनबाट राम्रो आम्दानी गर्न सफल हुनुभएको छ ।

म्याग्दीको रघुगङ्गा गाउँपालिका–३ पिप्लेकी सन्तोषी भण्डारीले विगत आठ वर्षदेखि पाँच रोपनी जग्गा भाडामा लिएर भैँसी, बाख्रा, कुखुरा र बङ्गुर पाल्दै आउनुभएको छ । स्वदेशमै आत्मनिर्भर बन्ने अठोट बोकेर व्यावसायिक पशुपालनमा होमिएकी ३१ वर्षीया उहाँले ‘समिर पुशपक्षीपालन केन्द्र’ स्थापना गरेर अहिले वार्षिक रु १२ लाख आम्दानी गरिरहनुभएको छ ।

‘‘पहिला पनि कुखुरापालन गर्थे, व्यावसायिक रुपमा गरेको २०६७ देखि मात्रै हो, त्यतिबेला मसँग लगानी गर्ने पूँजी थिएन, थोरै सङ्ख्याबाट कुखुरापालन थालेँ, त्यसबाट हुने आम्दानीलाई लगानी गर्दै जाँदा व्यवसायलाई विस्तार गर्न सकेँ”, उहाँले भन्नुभयो ।

अहिले आफ्नो फर्ममा २० लाख बढी लगानी भइसकेको उहाँको भनाइ छ । उहाँले १६ कुखुराबाट शुरु गरेको व्यवसाय अहिले सो स्तरको भएको हो । गलेश्वर–पिप्ले हुँदै भगवती जोड्ने सडक छेउमै व्यवसाय गर्दै आएकी भण्डारीले यातायातको सहज पहुँच भएकाले उत्पादित कुखुराको निर्यात र आवश्यक दानालगायतका सामग्री ढुवानीमा सहज भएको बताउनुभयो

कुखुरापालनको लागि उहाँले पाँचवटा खोर निर्माण गर्नुभएको छ । हरेक महीना एक हजारदेखि दुई हजारसम्म नियमित कुखुरा पाल्दा रु एक लाख आम्दानी हुने उहाँको अनुभव छ । कुखुरासँगै बाख्रापालनसमेत गर्दै आएकी उहाँको फर्ममा अहिले ९३ वटा बाख्रा छन् । वार्षिक २० वटासम्म खसी, बोका बिक्री हुने गरेका छन् ।

त्यस्तै उहाँ व्यावसायिक रुपमै भैँसीपालन समेत गर्दै आउनुभएको छ । उहाँले भन्नुभयो, “एउटै व्यवसायबाट लगानी उठाउन कठिन हुने भएपछि व्यवसायको क्षेत्र फराकिलो बनाएको हुँ, सबैबाट वार्षिक रु ५० लाख बराबरको कारोबार हुन्छ, आम्दानी भन्दा पनि व्यवसायबाट पाएको उपलब्धिबाट सन्तुष्ट छु”, उहाँले भन्नुभयो, “दुई छोराको पढाइ र घरखर्च चलाएर वार्षिक रु आठ लाख बढी आम्दानी गर्छु ।”

आफ्नो व्यावसायिक सफलतामा बुबा रेशमबहादुर र आमा हरिकुमारीको साथले अगाडि बढ्न थप आत्मबल मिलेको उहाँले बताउनुभयो । युवा महिला उद्यमी भण्डारीले गरेको पशुपालन नमूना रहेको रघुगङ्गा गाउँपालिका–३ का वडाध्यक्ष जीवन मल्लले बताउनुभयो ।
“उहाँले गरेको व्यवसाय अन्य युवाका लागि पनि प्रेरणादायी छ, हामीले प्रोत्साहनमूलक कार्यक्रम ल्याउने तयारी गरेका छौँ”, उहाँले भन्नुभयो, “उहाँजस्ता सफल कृषक र उद्यमीको पाठले स्वदेशमै युवाहरुलाई परिश्रम गर्ने सन्देश मिलेको छ ।”

प्रतिक्रिया दिनुहोस्

LIVE TV