१२ पुष २०७५, बिहीबार

काठमाडौं । अंग्रेजी नयाँ वर्षको दिन अर्थात् विक्रम सम्बत् अनुसार पुस १७ गते प्रस्तावित छैठौं ‘राष्ट्रिय पोसाक दिवस’ मनाइने भएको छ । राष्ट्रिय पोसाक संरक्षण महाअभियान नेपालले देशभर विभिन्न कार्यक्रम गरी पोसाक दिवस मनाउन लागेको हो ।

पोसाक संरक्षण महाअभियानअन्तर्गत पुस १७ गते बिहान ८ बजे काठमाडौंको माइतीघरदेखि बानेश्वरसम्म ¥याली र ¥यालीपछि कोणसभाको कार्यक्रम तय भएको छ । यससँगै सातै प्रदेशका राजधानी, मुख्य सहर र विदेशमा समेत प्रस्तावित राष्ट्रिय पोसाक दिवस मनाउने तयारी भइरहेको छ ।

‘विश्वभर अंग्रेजी नयाँ वर्ष मनाइरहँदा नेपाली मौलिक पहिचान झल्कने पोसाक दिवस मनाउने तयारी भएको छ ।’ महाभियानका अध्यक्ष राजानन्द माण्डब्यले भने, ‘नेपालीत्व विर्सिएर विदेशी नयाँ वर्ष नेपाली मन रमाउन सक्दैन ।’

तत्कालिन बाबुराम भट्टराई नेतृत्वको सरकारले २०६८ सालमा नेपालको राष्ट्रिय पोसाक दौरा, सुरुवाल, ढाका टोपी र गुन्यू, चोलीलाई राष्ट्रिय पोसाकबाट खारेज गरेपछि अहिले मुलुक राष्ट्रिय पोसाकबिहीन भएको छ । परिवर्तनका नाममा नेपाली पोसाक दौरासुरुवाल, ढाकाटोपी र गुन्यूचोलीलाई उपेक्षा गरिएको थियो । र, त्यसपछि नेपाली युवाहरुले सरकारलाई प्रस्तावस्वरुप नेपाली पोसाक दिवस मनाउन थालेका हुन् ।

आधुनिकताका नाममा पाश्चात्य पहिरन र सँस्कृतिले बर्चश्व जमाउँदै गरेको अवस्थामा नेपाली पोसाक र पहिचानका लागि नेपाली युवाहरुले यो दिवस मनाउन थालेका हुन् । नेपाली पोशाक संरक्षण अभियानका अभियन्ताहरु सरकारले नयाँ संविधान संशोधन गरेरै भए पनि दौरासुरुवाल, ढाकाटोपी र गुन्यूचोलीलाई राष्ट्रिय पोशाकको मान्यता दिन आग्रह गर्दै आएका छन् ।

प्रतिक्रिया दिनुहोस्

LIVE TV