२७ आश्विन २०७५, शनिबार

रामेछाप २७ असोज । स्थानीय निकायमा आफ्नो पार्टीको वर्चस्व भएको बेला नेपाल कम्युनिष्ट पार्टीका कार्यकर्ताहरुले राज्यकोषको व्यापक दरुपयोग भएको आवाज सर्वत्र उठिरहेको बेला रामेछापमा पनि सो क्रमले निरन्तरता पाएको छ । शनिवार तथा सार्वजनिक विदाको दिन कुनै पनि सरकारी गाडी चलाउन नपाउने सरकारको निर्णयलाई चुनौती दिदै जिल्ला समन्वय समिति रामेछापका प्रमुख प्रेमबहादुर खड्काले आफुले चढ्दै आएको सवारी साधन दुरुपयोग गर्दै आएका हुन् ।

सार्वजनिक विदाको दिन शनिवार विहान उनले प्रयोग गर्दै आएको वा १ झ ९४०७ नम्वरको गाडी पूर्व एमाले पार्टी निकट अनेमसंघकी केन्द्रिय सदस्य शान्ता सापकोटालाई निजी सामान लिएर दशैं मनाउनका लागि घर पठाएका थिए । सो क्रममा घरमा प्रयोग गर्ने सिरक, डस्ना, चामल, चिउरा लगाएतका सामाग्री लिएर सदरमुकाम मन्थलीबाट सापकोटाको रामेछाप नगरपालिका वडा नं १ गोठगाउँ स्थित घर जाँदै गरेको सरकारी गाडी मन्थलीको देवकोटा चोकमा पुगेपछि ट्राफिक प्रहरीले गाडीसहित नियन्त्रणमा लिएपछि यो कुराको खुलासा भएको हो ।

यस अघि पनि प्रमुख खड्काले विभिन्न समयमा आफ्ना नेता र कार्यकर्ताहरुको सुविधाका लागि राजधानी काठमाडौं र जिल्ला बाहिर र भित्रका विभिन्न ठाउँहरुमा समेत उक्त गाडी पठाउँदै आएका थिए । जुन कुराका वारेमा सामाजिक सञ्जाल र बाह्य रुपमा पनि व्यापक चर्चा हुदै आएको थियो । यसपटक पनि प्रमुख खड्काले त्यस कुराको वेवास्ता गर्दै आफ्ना पार्टी निकट अनेमसंघकी केन्द्रिय सदस्य सापकोटाको सुविधाका लागि सरकारी नियमको वेवास्ता गर्दै सामान लोड गरेर गाडी निजी प्रयोजनको लागि पठाएका थिए ।

उक्त गाडी टफिक प्रहरीले नियन्त्रणमा लिएपछि यस बारेमा व्यापक रुपमा कुरा बाहिर आएको छ । कानुनी रुपमा जिल्लाको सबैभन्दा ठूलो सरकारी प्रमुख र जनप्रतिनिधिले सरकारी नियमको वेवास्ता गर्दै देखाएको यस किसिमको हर्कतले जनप्रतिनिधिहरुप्रति सर्वसाधारणको ध्यान आर्कर्षित भएको छ ।

गाडी नियन्त्रणमा लिएपछि संक्षिप्त प्रतिक्रिया दिदै ट्राफिक प्रहरी प्रमुख रामेश्वर पाण्डेले सरकारी नियमको वेवास्ता गर्दै सरकारी गाडी व्यक्तिको सुविधाको लागि प्रयोगमा ल्याउन दुःखदायी कुरा भएको बताए ।

उनले भने– ‘दुर्घटना भवितव्य र सरकारी कामको सिलसिलामा बाहेक विदाको दिनमा सरकारी गाडी चलाउने छुट कसैलाई छैन् । तर जिल्ला समन्वय समितिको प्रमुख जस्तो व्यक्तिले चढ्दै आएको गाडी सार्वजनिक विदाको दिन निजी सामाग्रीसहित नियन्त्रणमा लिनु पर्दा आफुलाई दुःख लागेको बताए ।

गाडी व्यक्तिगत प्रयोजनमा लैजादै गर्दा ट्राफिक प्रहरीले नियन्त्रणमा लिएको सम्वन्धमा जिल्ला समन्वय समितिका प्रमुख प्रेमबहादुर खड्कासँग सम्र्पक गर्दा उनले यस बारेमा आफुलाई कुनै जानकारी नै नभएको बताए ।

उनले भने– ‘यस बारेमा मलाई कुनै पनि जानकारी छैन् । गाडी चालकको तजविजले लगेको हुनसक्छ । यदी यसरी प्रयोगमा ल्याएको हो भने यो गलत काम हो ।’ दीपक भट्ट,

प्रतिक्रिया दिनुहोस्

LIVE TV