२३ आश्विन २०७५, मंगलवार

भक्तपुर । टेखाच्व टोलस्थित पुलांसः शिवरात्री गुथिले रु ५० हजार राशिको पुरस्कारसहित यसवर्षको ‘भाजुवीर सिरपा’ जितेको छ ।

काठमाडौँ उपत्यकामा लोपोन्मुख बाजा जोगाउने उद्देश्यले भाजुवीर सिरपा उपसमितिले आयोजना गरेको सो प्रतियोगिता गुथिको तर्फबाट कलाकार लक्ष्मीप्रसाद मानन्धरले मौलिक तथा लोपोन्मुख बाजा अर्थात ‘पच्छिमा’ बजाएर प्रतियोगिता जितेका हुन् । प्रतियोगितामा रु ३० हजारसहित थिमिको सिवाः सायमि खलः दोस्रो तथा रु २० हजारसहित भक्तपुरकै साःकोलान शिवरात्री गुथि तेस्रो भए । खलःका तर्फबाट कलाकार नजरमान मानन्धर र गुथिका तर्फबाट विष्णुबहादुर मानन्धरले बाजा बजाउनुभएको थियो ।

पूर्वसांसद तथा पुरस्कारका दाता लक्ष्मीदास मानन्धरले पच्छिमा, नगरा, डबडब, कोंचाखि, धाःबाजा, खिं बाजा, ताः, ख्वालीमाली, म्वाय्ली, बाँसुरी तथा अन्य मौलिक बाजा संरक्षण गर्न २०४३ सालदेखि आफ्नो बाजेको सम्झनामा अक्षयकोष स्थापना गरी वर्सेनी सो प्रतियोगिता आयोजना गर्दै आउनुभएको छ । उक्त प्रतियोगितामा काठमाडौँका चस्वाँद्व मानन्धर सनागू खलः, पाक्व पुखुद्याः मानन्धर सनाः खलः, थँहिटी मानन्धर गुथि, साँखुको सक्व मानन्धर गुथि, भक्तपुरको पुलांसः शिवरात्री गुथि, तापालाछी, साःकोलान शिवरात्री गुथि, बनेपाको वाङख्यो दाफा भजन खलः, मध्यपुरको थिमि मानन्धर सङ्घ, सिवाः साय्मि खलः लगायत १० टोलीको सहभागिता रहेको थियो ।

शहीद प्रतिष्ठानमा श्रेष्ठ

शहीद बैकुण्ठहरि श्रेष्ठ स्मृति प्रतिष्ठानको पाँचौ साधारणसभाले श्यामकृष्ण श्रेष्ठको नेतृत्वमा नयाँ कार्यसमिति चयन गरेको छ । चार वर्षको लागि चयन गरीको सो प्रतिष्ठानको उपाध्यक्षमा गणेशकुमार श्रेष्ठ, सचिवमा कृष्णमोहन जोशी, कोषाध्यक्षमा दामोदर श्रेष्ठ तथा सदस्यमा हरिबहादुर श्रेष्ठ, जगतबहादुर श्रेष्ठ, चण्डिका श्रेष्ठ, लक्ष्मीशोभा श्रेष्ठ र श्यामलक्ष्मी श्रेष्ठलाई चयन गरिएको छ ।

LIVE TV