१२ आश्विन २०७५, शुक्रबार

रसुवा, १२ असोज : हिमाली पदयात्राका लागि लाङटाङ तथा गोसाइँकुण्ड क्षेत्रमा पर्यटकको आगमन शुरु भएको छ ।
लाङटाङ राष्ट्रिय निकुञ्ज कार्यालयका अनुसार विभिन्न देशबाट हिमाली पदयात्रामा फाटफुट रुपमा आउने गरे तापनि शरद् ऋतुको आगमनसँगै हिमाली क्षेत्रमा पर्यटकको आगमन बढ्न थालेको हो ।

पर्यटक आगमन हेलम्बु, सुन्दरीजल तथा धुञ्चेतर्फबाट लाङटाङ तथा गोसाइँकुण्डको भ्रमण हुने गरेको र पर्यटकलाई खानेबस्ने सुविधाका लागि ठाउँठाउँमा होटल तथा लज सञ्चालन भएको, हिमाली क्षेत्र चिसोपन बढ्दै गएकाले तातोखाले शय्या व्यवस्थापनका साथै आवश्यक खाद्यान्नसमेत भण्डारण भइसकेको होटल व्यवस्थापन गोसाइँकुण्ड पदमार्ग उपसमितिले जनाएको छ ।

गत वर्ष सोही अवधिमा करीब तीन हजार पर्यटकको आगमन भएको थियो । यस वर्ष भारी वर्षा र सडकमार्ग अवरुद्ध भरहँदा एक हजार २०० हाराहारीमा पर्यटकको आगमन भएको छ । अब यस क्षेत्रमा गत हप्तादेखि वर्षा हटिसकेको र सडकमार्ग सहज रुपले पुनःसञ्चालन भइसकेका कारण अबका दिनमा दैनिक सयभन्दा बढी पर्यटकको आगमन हुने प्रक्षेपण गरिएको लाङटाङ राष्ट्रिय निकुञ्जका सहायक संरक्षण अधिकृत अभिनाष थापा मगरले बताउनुभयो ।

चालु आर्थिक वर्षमा भने पर्यटकको आगमनबाट ३० लाखभन्दा बढी प्रवेश शुल्कवापतको राजस्व दाखिला भइसकेको बताइएको छ । पर्यटक हिँड्ने पैदलमार्गसमेत वर्षायामको झारपात सफा गर्ने काम सम्पन्न भइसकेकाले घरबासका व्यवसायी पर्यटकको प्रतीक्षारत रहेको गतलाङ पाल्दोर पिक युवा क्लबका अध्यक्ष फुर्पु तामाङले जानकारी दिनुभयो ।

रसुवा जिल्लाको धुञ्चेबाट गोसाइँकुण्ड र स्याफ्रुबेंसीबाट गतलाङ एवं अर्काे बाटो लाङटाङतर्फको पदयात्रा शुरु हुने र साढे दुई दिनमा पर्यटक उचाइको गन्तव्यमा पुग्ने गरेको पथप्रदर्शकको भनाइ छ । लाङटाङ पदयात्रामा सबभन्दा उचाइमा पर्ने संसारको सुन्दरतम स्थानमध्येको क्याञ्जिन उपत्यका तीन हजार ९०० मिटर उचाइमा पर्छ । मानव बस्ती नजीक पर्ने नेपालकै लामो हिमनदी यही क्षेत्रमा पर्छ । गत वर्ष १३ हजार ७८९ पर्यटकको आगमन भएको थियो । इजरायल फ्रान्स, जर्मनी, स्वीट्जरल्याण्ड, दक्षिण कोरिया, मलेसिया, अमेरिका, बेलायत, अष्टे«लिया, नेदरल्याण्डसलगायत ३० भन्दा बढी देशका नागरिकको आगमन भएको निकुञ्जले जनाएको छ ।

हिमाली क्षेत्रको भ्रमणमा गएका पर्यटकलाई समस्या आएमा तत्काल उद्धारका लागि मागबमोजिम हेलिकोप्टर उडाई तुरुन्तै राजधानी पु¥याउन हेलिकोप्टर कम्पनी तयार रहेको अल्टिच्युड एयरका प्रबन्धक सोभित गौचनले बताउनुभयो ।

स्थानीय खाना तथगा उकालीओराली, भञ्ज्याङ, चौतारी, कुण्ड, ताल र झरना यहाँका विशेषता हुन् । धुञ्चेबाट चन्दनबारी, लौरीविनायक हुँदै गोसाइँकुण्ड पुगिन्छ भने लाङटाङ पदमार्गका लागि स्याफ्रुबेंसीबाट एउटा खोलाको तीरैतीर अर्को खामजिङतर्फको मार्ग छन् । स्याफ्रुबेंसीबाट गोल्जुङ, गतलाङ, पार्वतीकुण्ड, थाम्बुचेत, तातोपानी, नागथली, थुमन, टिमुरे हुँदै बृद्धिम घरबाससम्म तामाङ सम्पदा मार्ग तय भएको छ । यी मार्गबारे क्रमशः प्रचारप्रसार हुन थालेकाले पर्यटकको ओहोरदोहोर हुन थालेको रसुवा नुवाकोट पर्यटन समाजका अध्यक्ष बलराम (दुर्गानाथ) न्यौपाने ले जानकारी दिनुभयो ।

LIVE TV