२३ भाद्र २०७५, शनिबार

बर्दिवास । महोत्तरी जिल्लाको भङ्गाहा नगरपालिका–६ जमुनियाँमा शुक्रबार राति डकैती भएको छ ।

सो बस्तीका अर्जुन भुजेलको घरमा शुक्रबार मध्यरातको समयमा २०\२२ जनाको समूहमा पुगेका हतियारधारी डाँकाले बन्दूक र खुकुरी चलाएर पाँच जनालाई घाइते बनाएर रु १० लाखभन्दा बढी मूल्यको धनमाल लुटेर लगेका पीडित परिवारले बताएका छन् ।

मध्यरातको समयमा पुगेका डाँकाले घरधनी अर्जुन भुजेल सुतेका कोठा धम्क्याएर खोल्न लगाएलगत्तै बन्दुक चलाएका थिए । डाँका कोठाभित्र पसेपछि उनीहरुलाई छलेर भाग्ने क्रममा अर्जुनको गाला र अनुहारमा डाँकाले चलाएको बन्दुकको छर्रा लागेको छ ।

कालो नकाव लगाएका डाँकाले अर्जुनकी पत्नी अञ्जुदेवी, छोराहरु दीपेन्द्र र अमित एवं साला सुमित बुढाथोकीलाई शरीरका विभिन्न अङ्गमा खुकुरी चलाएर घाइते बनाएका छन् । डाँकाले चार राउण्ड गोली चलाएर सानो बस्तीलाई आतङ्कित बनाएका डाँकाको खुकुरी प्रहारबाट घाइते भई शुभस्वस्तिक अस्पताल बर्दिवासमा उपचार गराइरहेका अमित भुजेलले बताउनुभयो ।

घरका परिवारजन भाग्न थालेसँगै घरमा रहेका सुनचाँदीका गहना, धातुका भाँडा र नगदसहित रु १० लाख मूल्य बराबरको धनमाल लुटेर डाँका फरार भएका थिए । घटनाको जिल्ला प्रहरी कार्यालय महोत्तरीले पुष्टि गरेको छ ।

डकैती भैरहँदा नजिकैको जमुनिया चोकमा ड्युटीमा खटिएका सशस्त्र र नेपाल प्रहरीसहितको टोलीलाई सहयोगको लागि गुहार माग्दासमेत प्रहरी घटनास्थल जान डराएको स्थानीयको भनाइ छ । प्रहरीले आफूहरुसँग हातहतियार नभएको भन्दै घटनास्थलमा जान नमानेको स्थानीयले बताएका छन् ।

घाइते पाँचै जनाको अहिले बर्दिवास–१४ स्थित शुभस्वस्तिक अस्पतालमा उपचार भइरहेको छ । घटनालगत्तै सो बस्ती र अन्य शङ्कास्पद ठाउँमा डाँकाको खोजीमा प्रहरी परिचालित गरिएको जिल्ला प्रहरी कार्यालय महोत्तरीका प्रहरी उपरीक्षक ईश्वर कार्कीले जानकारी दिनुभयो । रासस

प्रतिक्रिया दिनुहोस्
LIVE TV