२० जेष्ठ २०७५, आईतवार

काठमाडौं । गृहमन्त्री रामबहादुर थापा बादलले सवारी साधन चेकजाँच गरेका छन् । आइतबार बिहान थापाथलीमा सडकमै पुगेर गृहमन्त्री थापाले सार्वजनिक सवारीसाधनको प्रदुषण चेकजाँच गरेका हुन ।

सार्वजनिक सवारीसाधन चेकजाँच गर्न गृहमन्त्रीसँगै वन तथा वातावरण मन्त्री शक्ति बस्नेत पनि सवारी साधन चेकजाँच गर्नका लागि थापाथली पुगेका थिए । विश्व वातावरण दिवसको अवसर पारेर वन तथा वातावरण मन्त्रालयले आयोजना गरेको सप्ताहव्यापी कार्यक्रमअन्तर्गत आज मन्त्रीद्वय सडकमै पुगेर प्रदूषण चेकजाँचमा सहभागी भएका हुन्  । सो क्रममा गृहमन्त्री थापाले स्वस्थ वातावरण भएमात्र नागरिक स्वस्थ रहने भन्दै यसमा सबैको साथ र सहयोग अपरिहार्य रहेको बताए  । 

साधनले प्रदूषण मापदण्ड पालना गर्नु अनिवार्य रहेको भन्दै यसको नियमित चेकजाँच आवश्यक रहेको गृहमन्त्री थापाको भनाइ छ ।  उनले धुलो र प्रदूषण बढ्नुमा भ्रष्टचार पनि जोडिएको भन्दै यसलाई निस्तेज पारिने बताए  । बस्नेतले वातावरण दिवसको अवसर पारेर सप्ताहव्यापी कार्यक्रमको आयोजनाअन्तर्गत आजको कार्यक्रम गरिएको बताए  ।

उनले  वातावरण दिवसको अवसर पारेर प्रधानमन्त्रीकै सहभागितामा यही जेठ २२ गते स्वच्छ नेपाल महाभियान शुरु गर्न लागिएको जानकारी दिए । प्रदूषण नियन्त्रण, फोहर व्यवस्थापन र हरियाली प्रवद्र्धनलाई एकीकृत गरेर महाभियान शुरु गर्न लागेको उहाँको भनाइ छ । यो अभियानमा प्रदेश र स्थानीय सरकार, निजी क्षेत्र र यो क्षेत्रमा क्रियाशील संघसंस्थासँग पनि सहकार्य गरिने बताए  ।

प्रतिक्रिया दिनुहोस्

LIVE TV