१६ बैशाख २०७५, आईतवार

वुहान, (एजेन्सी)
अनौपचारिक चीन भ्रमणको दोस्रो दिन शनिबार भारतीय प्रधानमन्त्री नरेन्द्र मोदी र राष्ट्रपति सी जिनपिङले वुहान शहरस्थित इस्ट लेकको किनारामा टहल्दै विविध मुद्दामा छलफल गरे।

दुई नेताले आतंकवाद साझा खतरा भएको र यसलाई रोक्नका लागि आपसी सहयोग बढाउने प्रतिबद्धता व्यक्त गरे। यसबीच प्रधानमन्त्री मोदीले आफ्नो ट्विटर अकाउन्टमा सीसँगको अनौपचारिक भेटवार्ताका तस्वीर पोस्ट गरेका छन्।

आतंकवाद, सुरक्षा, तथा विकासका लागि मिलेर काम गर्नुपर्नेमा दुई नेता सहमत भएको बताइएको छ। यसक्रममा सी र मोदीबीच मिलेर काम गर्नुपर्ने विविध क्षेत्रका विषयमा छलफल भएको स्रोतले बताएको छ।

तालको किनारामा टहल्ने क्रममा सीले मोदीलाई त्यहाँ फुलेका कैयौं फँलको जानकारी दिए। दुई नेताबीचको पहिलो अनौपचारिक भेटवार्तालाई मोदीले निक्कै प्रशंसा गरे।

टहल्ने क्रममा दुवै नेता धेरै परसम्म पुगे। यस क्रममा उनीहरूसँग दोभाषे पनि थिए। बाटोमा चिनियाँ राष्ट्र«पति सीले त्यहाँको विशेषताका बारे बताइरहेका थिए।
वुहानको इस्ट लेकमा एउटै डुंगामा बसेर नौका विहार गरेका प्रधानमन्त्री मोदी र राष्ट्र«पति सीले दुई देशका सांस्कृतिक सम्बन्धको चर्चा गरेका थिए।

इस्ट लेकमा प्रधानमन्त्री मोदी र राष्ट्रपति सीले नौका विहारका क्रममा चिया लिएर पनि कुराकानी गरे। दुवैले तालको किनारामा घुमफिरपछि केही समय आराम गरी अनौपचारिक कुराकानी पनि गरेका थिए।

सीले प्रधानमन्त्रीलाई विशेष चिया पिलाए। मोदीले चियाको चुस्की लिएपछि सर्ब गर्नेलाई धन्यवाद दिए।

चिया पिउने बेला प्रधानमन्त्री मोदीले किटली उठाएका थिए र चिनियाँ राष्ट्रपति सीले उनीसँग केही कुरा गरेका थिए। त्यतिबेला प्रधानमन्त्री मोदी मुस्कुराइरहेका थिए।

‘अनौपचारिक वार्ताले निरन्तरता पाउनुपर्छ’ प्रधानमन्त्री बनेपछि नरेन्द्र मोदीको यो चौथो चीन भ्रमण हो। तर यसअघिका भ्रमणका बेला यी दुई नेताबीच यसरी ‘अनौपचारिक शिखर वार्ता’ भएको थिएन। प्रधानमन्त्री मोदीले यस प्रकारको अनौपचारिक भेटवार्ता भइरहनुपर्ने बताउँदै सी जिनपिङलाई अर्को वर्ष भारत आउन निम्तो दिए।

मोदीले भने– ‘यस प्रकारको अनौपचारिक भेटवार्ता दुई देशबीच परम्परा बन्नेछ भन्ने मैले अपेक्षा गरेको छु। यस्तो भेटवार्ता अर्को वर्ष सन् २०१९ भारतमा भए मलाई खुसी लाग्नेछ।’

चीनको हुबेई प्रान्तको राजधानी वुहानमा भएको उक्त अनौपचारिक बैठकपछि राष्ट्रपति सीले आगामी दिनमा भारत र चीनबीच सहयोग तीव्र हुने र आफूले दुई देशको सम्बन्धमा सुनौलो भविष्य देखेको बताए। नेपाल समाचारपत्रबाट

 

LIVE TV