बक्स अफिसले फिल्म उद्योगलाई थप व्यावसायिक बनाउँछः मन्त्री बस्नेत



प्रकाशित मिति : Feb 13, 2018

काठमाडौं । सूचना तथा सञ्चारमन्त्री मोहनबहादुर बस्नेतले चलचित्रसम्बन्धी कारोबारलाई व्यवस्थित र पारदर्शी बनाउन लागू भएको विद्युतीय टिकेटिङ प्रणाली -बक्स अफिस_ले चलचित्र उद्योगलाई थप व्यावसायिक बनाउने बताएका छन् ।

सूचना तथा सञ्चारमन्त्री मोहनबहादुर बस्नेत चलचित्र सम्बन्धी कारोबारलाई व्यवस्थित र पारदर्शी बनाउन लागू भएको विद्युतिय टिकेटिङ प्रणाली (बक्स अफिस) केन्द्रीय सर्भरको मंगलबार काठमाडौंको थापाथलीमा उद्घाटन गर्दै।

नेपाल चलचित्र विकास बोर्डको सक्रियतामा आजदेखि लागू भएको ‘बक्स अफिस’ को उद्घाटनपछि मन्त्री बस्नेतले अर्बाैंको लगानी र हजारौँले रोजगारी पाएको चलचित्र क्षेत्र अब आर्थिक दृष्टिले समेत पारदर्शी हुने धारणा व्यक्त गरे। विगतमा ‘बक्स अफिस’ लागू गर्ने सम्बन्धमा धेरै बहस भए पनि आवश्यक समन्वयको कमीले लागू हुन नसकेको बताउँदै उनले सरोकारयुक्त सबैको सहयोग र सक्रियताले आजदेखि लागू भएकोमा खुशी व्यक्त गरे।

कार्यक्रममा चलचित्र बोर्डका अध्यक्ष निकिता पौडेलले बोर्डको लगानी र सक्रियतामा ‘बक्स अफिस’ लागू हुन लागेको अवगत गराउँदै यसलाई सफल बनाउन सरोकारयुक्त सबैको सहयोगको अपेक्षा गरे।

कार्यक्रममा बोर्डका सदस्य नरेन्द्र महर्जन, नेपाल चलचित्र संघका अध्यक्ष प्रदीपकुमार उदय, नेपाल चलचित्र निर्माता संघका अध्यक्ष आकाश अधिकारीलगायतले ‘बक्स अफिस’ ले चलचित्र क्षेत्र व्यस्थित र थप मर्यादित भई उद्योगका रुपमा स्थापना हुने धारणा व्यक्त गरे।

यही फागुन ७ गतेभित्र काठमाडौं उपत्यकाका सम्पूर्ण विद्युतीय टिकेटिङ प्रणाली जडान भएका मल्टिप्लेक्स चलचित्र घरमा र केन्द्रीय सर्भरबीच लिंक गर्न आवश्यक उपकरण उपलब्ध गराइने बोर्डले जनाएको छ।

केन्द्रीय सर्भर काठमाडौंको थापाथलीमा स्थापना गरिएको छ। पहिलो चरणमा उपत्यकामा लागू गर्न आगामी असार ३१ गतेसम्म उपत्यकाभित्र सञ्चालनमा रहेका सम्पूर्ण चलचित्रघरमा विद्युतीय टिकेटिङ प्रणाली जडान गरी केन्द्रीय सर्भरसम्म लिंक गरेर पूर्णरूपमा लागू गरिने बताइएको छ।

Advertisements

प्रतिक्रिया दिनुहोस्



Copyright © 2018 All rights reserved by NBC.
Designed by appharu.com