११ माघ २०७४, बिहीबार

काठमाण्डौ । जुवा खेल्दा–खेल्दै पक्राउ परेका ९ जना जुवाडेलाई प्रहरीले मुद्दा नै नचलाई छाडेको छ ।

महानगरीय प्रहरी बृत्त सातदोबाटोले बुधबार ललितपुरको सानागाउँ लुभुबाट पक्राउ गरेका जुवाडेलाई बिहीबार मुद्दा नै नचलाई छाडेको छ ।

ललितपुरको सानागाउँस्थित शिवकुमार राईको घरबाट १६ वटा कौडा र ४ लाख ४० हजार रुपैयाँसहित ९ जना जुवाडेलाई जुवा खेलिरहेको अवस्थामा प्रहरीले पक्राउ गरेको थियो ।

जुवा खेल्दा–खेल्दै प्रहरीले घरधनी शिवकुमार राईसहित सानुकान्छा बस्नेत, सुशील न्यौपाने, हस्तमान स्याङ्तान, पूर्ण माली, रत्न माली, उमेश खत्री, कुमार थापामगर, बुद्धिराम डिम्डुङलाई पक्राउ गरेको थियो ।

उनीहरुलाई जुवा ऐनअनुसार मुद्दा चलाउनु पर्नेमा म्यादै नथपी प्रहरीले छाडेको छ । सातदोबाटो प्रहरी बृत्तले लागूऔषध ब्यूरोका प्रमुख डीआइजी ठूले राईको दबाबमा छाडिएको स्रोतले बताएको छ ।

राई यसअघि ललितपुर प्रहरी परिसरका प्रमुख थिए । प्रहरीले जुवा खेल्दा–खेल्दै पक्राउ परेका जुवाडेहरुको मुद्दा सरकारी वकिल कार्यालयमार्फत् अदालतमा म्याद थपको प्रक्रिया शुरु गरी कम्तिमा एक हप्तामा मुद्दा दायर गर्दै आएको छ ।

तर, ललितपुरबाट बुधबार पक्राउ परेका जुवाडेको म्याद थपको लागि सरकारी वकिल कार्यालयबाट नलगी सोझै अदालतमा पेश गरी छुटाइएको थियो ।

सातदोबाटो बृत्तका प्रहरी प्रमुख सिलवालले जुवाडेबाट आर्थिक लाभ लिएर एक दिनमै अदालतमा मिलाई छाडेको आरोप छ । सातदोबाटो बृत्तका डीएसपी विनोद सिलवालले जुवा ऐनमा बरामद रकम जफत गरी राजश्वमा जाने ब्यवस्था गरेको बताए ।

हिजो समातेर म्याद नथपी छाडेको बारेमा डीएसपी सिलवालले भने–‘अदालतले नै छाडेको हो ।’

LIVE TV