२४ पुष २०७४, सोमबार
  • राजु पौडेल

झापा। झापाको गौरीगञ्ज गाउँपालिका अन्तर्गत नेपाल भारत सीमाको १० गजा क्षेत्रमा रहेका पिल्लरहरुमध्ये ७२ वटा हराएको पाइएको छ ।

सीमानामा रहेका पिल्लरहरु निर्माण मर्मत कार्यमा सहभागी रहेका नेपाल भारत संयुक्त प्राविधिक टोलीले दिएको जानकारी अनुसार झापाको रतुवा खेला देखि माई खोलासम्म साना ठुला गरी २२८ वटा पिल्लर रहेकामा ७२ वटा फेला नपरेको सशस्त्र प्रहरी वल वोर्डर आउट पोष्ट खजुरगाछीले जनाएको छ ।

नेपाल भारत संयुक्त टोलीका नापी विभाग उपसचिव शिव लम्सालका अनुसार पूर्व मेची देखि महाकालीसम्मका पिल्लरहरु मर्मत र निर्माणका क्रममा गौरीगंज क्षेत्रको १० गजाको पिल्लरहरु अवलोकन गरी निर्माण गर्ने कार्य शुरु गरेको छ । यस क्षेत्रमा रहेका १५ वटा मुख्य स्तम्भहरु मध्ये ४ वटा हराएका छन् । त्यसमध्ये २ वटा मर्मत गर्नु पर्ने, ९ वटा यथावत रहेका छन् । मझौला स्तम्भ ४ वटा नै यथावत रहेका छन् ।

साना स्तम्भ २ सय ७ वटा मध्ये ६७ वटा हराएका छन् भने १ सय १६ वटा यथावत रहेको, १६ वटा मर्मत गर्नुपर्ने र ४ वटा पुणर्निमाण गर्नुपर्ने जनाइएको छ । रिफ्ररेन्स स्तम्भ २ वटा मध्ये १ वटा मर्मत गर्नु पर्ने जनाइएको छ । संयुक्त टोलीका अनुसार अब निर्माण गरिने पिल्लरहरु विगतको भन्दा केही ठूलो आकारको हुने जनाइएको छ ।

प्रतिक्रिया दिनुहोस्

LIVE TV