१० पुष २०७४, सोमबार

पाँचथर । बिर्तामोड युनाइटेड झापा पाँचथरको फिदिममा जारी नवौं फाल्गुनन्द गोल्डकप फुटबल प्रतियोगिताको सेमिफाइनलमा प्रवेश गरेको छ ।

आज भएको क्वार्टरफाइनल खेलमा आयोजक फिदिम स्पोटिङ क्लबलाई ७—१ गोल अन्तरले पराजित गर्दै युनाइटेड झापा सेमिफाइनल प्रवेश गरेको हो । युनाइटेड झापाका तर्फबाट विशाल राईले खेल शुरु भएको पहिलो हाफको ६औं ३६औँ र दोस्रो हाफको १७औँ मिनेटमा गोल गर्दै ह्याट्रिक गरेका थिए ।

यसैगरी युनाइटेड झापाकै तर्फबाट कर्ण लिम्बूले पहिलो हाफको १९औँ र दोस्रो हाफको ३०औं मिनेटमा गरी दुई गोल गरेका थिए भने हिसबु लिम्बूले पहिलो हाफको २८औं मिनेटमा र नरेन लिम्बूले दोस्रो हाफको २७औँ मिनेटमा एक–एक गोल गरेका थिए ।

खेल अवधिभर दबाबमा रहेको आयोजक फिदिम स्पोर्टिङ क्लबका तर्फबाट भने मनिष थापाले पहिलो हाफको १२औं मिनेटमा एक गोल गरेका थिए । आज भएको खेलमा उत्कृष्ट प्रदर्शन गरेका झापाका विशाल राई नै ‘म्यान अफ दी म्याच’ घोषित भए ।

प्रतियोगिताअन्तर्गत भोलि युकेएफसी।दार्जिलिङ र अग्नि रुपन्देही–११ बीच प्रतिस्पर्धा हुने आयोजक फिदिम स्पोर्टिङ क्लबका अध्यक्ष बिमल श्रेष्ठले जानकारी दिनुभयो ।

प्रतियोगिताको विजेताले रु तीन लाख र उपविजेताले रु दुई लाख हात पार्नेछ । आगामी पुस १६ गतेसम्म सञ्चालन हुने प्रतियोगितामा एपिएफ क्लब काठमाडौँ, युकेएफसी दार्जिलिङ, अग्नि रुपन्देही–११, विर्तामोड युनाइटेड झापा, मिसन युनाइटेड क्लब ताप्लेजुङ, आयोजक फिदिम स्पोर्टिङ क्लब, त्रिभुवन आर्मी क्लब काठमाडौँ र मोरङ–११ गरी १० टोली सहभागी छन् ।

LIVE TV