चिनियाँ कम्पनीसँग गरिएको बूढीगण्डकी जलविद्युत् आयोजना सम्झौता खारेज

काठमाडौं, नेपाल सरकारले बूढीगण्डकी जलविद्युत् आयोजना निर्माणका लागि चिनियाँ कम्पनी गेजुवासँग गरेको सम्झौता खारेज गर्ने निर्णय गरेको छ।

आज बसेको मन्त्रिपरिषद् बैठकले सरकारको यसअघिको निर्णय बदर गरेको हो।यसअघि संसदको अर्थ र कृषि तथा जलस्रोत समितिले बुढीगण्डकी आयोजना निर्माणको जिम्मा चिनियाँ कम्पनीलाई दिने प्रक्रिया रोक्न सरकारलाई निर्देशन दिएका थिए।

गएको जेठ ९ गतेको मन्त्रिपरिषद बैठकले बूढीगण्डकी जलविद्युत् आयोजना निर्माणको जिम्मा चाइनाको गेजुवा कम्पनीलाई दिने निर्णय गरेको थियो। यसका लागि तत्कालीन ऊर्जामन्त्री जनार्दन शर्माले भूमिका खेलेका थिए।अनियमित र हचुवा ढंगले सम्झौता भएको भन्दै संसदीय समितिको निर्देशन बमोजिम खारेज गरिएको मन्त्रालयले जनाएको हो ।

गेजुवालाई जिम्मेवारी दिनुअघि आयोजना ६ सय मेगावाट क्षमतामा सरकारले निर्माण गर्ने तयारी गरेको थियो। विस्तृत इन्जिनियरिङ अध्ययनका क्रममा क्षमता बढाएर सरकारले १२ सय मेगावाट बनाउन लागेको थियो।