१९ कार्तिक २०७४, आईतवार

काठमाडौं । जाडोको सिजन सुरु भएसँगै पाँच जना राउटेको एक समूह गत बिहीबार प्रधानमन्त्रीको सचिवालय पुगे । सुर्खेतबाट आएका त्यही समूहमा उपराष्ट्रपति नन्दकिशोर पुनका छोरा दिपेश पुनका मित दिपक शाही पनि रहेका थिए ।

आफूहरुको खानेकुरा सकिएको र जाडो मौसमको सुरुवात भएसँगै आफूहरुलाई समस्या भएकोले प्रधानमन्त्री शेरबहादुर देउवासँगै अन्य पार्टीका शीर्ष नेताहरुसँग भेटेर सहयोग माग्ने र कठ्याङ्ग्रीदो जाडोबाट बच्नको लागि उनीहरु कम्मल, सिरक लगायतका सामाग्री लिन आएका थिए ।

तर राउटेको समूहलाई प्रधानमन्त्री देउवाले भेट्न मानेनन् । राउटे समूहले प्रधानमन्त्री देउवाको सचिवालयमा फोन गरेर भेट्ने समय उपलब्ध गराइदिन आग्रह गरेको तर बिहीवार देउवा धनगढी जान लागेको भन्दै टारेको भन्दै उनीहरूले दुखेसो पोखे ।

प्रधानमन्त्रीको त्यस्तो अभिव्यक्तिप्रति निराश बनेका उनीहरुले उपराष्ट्रपतिका छोरा दिपेश पुन र पर्यटन व्यवसायी टासी लाक्पा शेर्पालाई फोन गरे । पुन र शेर्पाले फोनमार्फत नै उनीहरुको समस्या बुझे र शुक्रबार भेट्ने प्रतिबद्वता जाहेर गरे ।

शुक्रबार बेलुका राउटेहरुलाई भेटेर पुन र शेर्पाले उनीहरुलाई ८० वटा कम्बल सहयोग गरे । एउटा घरमा २ वटा गरी ४० परिवारलाई शेर्पा र पुनले कम्बल सहयोग गरेका हुन् । राउटेहरुको आउने जाने खर्च समेत हेरिदिएको टासी लाक्पा शेर्पाले बताए ।

केही समय अघि आगोले पोलेर घाइते भएका राउटेको राजाको छोरा कपिललाई पुन र शेर्पाले काठमाडौं ल्याई वीर अस्पतालमा उपचार गराएर नयाँ जीवन दिएका थिए ।

प्रतिक्रिया दिनुहोस्
LIVE TV